萬千星輝賀台慶｜極落力Hard sell汪明荃演唱會 網民批5大失敗點：年年賣慘

TVB年度盛事《萬千星輝賀台慶》昨晚（19日）完滿落幕，藝員們盛裝打扮齊賀TVB 57周年。今年台慶主題為「同一家人，與你前行」，司儀陣容包括汪明荃、顧紀筠、車婉婉、陳貝兒、麥美恩、朱凱婷、陳懿德、倪樂琳、鄧梓峰、林曉峰、林盛斌、陸浩明、鄭衍峰、周奕瑋、許文軒、何振然。台慶有大抽獎之外，亦邀請到吳啟華、廖偉雄、盧海鵬及林峯「回家」。不過，唔少網民覺得今年台慶有幾項失敗點，包括毫無新意，唔少橋都只係翻炒又翻炒，睇到好尷尬。

TVB台慶失敗點 1：極落力Hard sell汪明荃

汪明荃已效力TVB共53個年頭，今次台慶佢就打頭陣，於節目開首環節大玩「回憶殺」，表示「我準備變番後生女，帶大家去我嘅少女時代，由我第一日返工開始，一齊穿梭咁多年嘅電視盛世。」另外，整個台慶之中，又有唔少藝人開口埋口都提住汪明荃11月23日及24日嘅紅館演唱會，仲整埋大型張演唱會門票出嚟，網民表示極Hard Sell：「阿姐啲飛賣唔晒？」。

TVB台慶失敗點 2：翻炒又翻炒

台慶Part 2主題「娛樂大眾」表演項目為「福祿壽年度娛樂風雲人物」；首先由阮兆祥帶領丁子朗、冼靖峰、黃奕斌、文佐匡、黃星綽、黃建東、王玲組成限定組合「West Kowloon」跳唱，網民直言TVB點解要抽自己水：「其實tbb自己都抽咗loong9好多次水，即係個台本身就覺得個選秀節目係笑話」、「原裝都唔紅，扮嚟都唔知做乜，自己扮番自己團先好笑」、「真係睇到好尷尬」、「完全唔好笑」等等。王祖藍扮汪明荃大跳阿姐嘅演唱會主題歌《Make My Day》；李思捷則化身舞台王者「國貨城」勁歌熱舞及「綠百鳴」獻唱《記憶棉》。另外，關嘉敏再一次扮演譚輝智唱《屈到病》，與本尊真譚輝智同框；阮兆祥又扮何太，網民就覺得其實大部分都已玩過晒，無新意可言：「關嘉敏演藝最高峰會唔會就係而家」、「真係好悲哀，幾十年都係無進步過，仲係淨係識拎扮野黎上大台」、「全部都玩過晒」等等。不過，王祖藍扮演Babyface哥唱《Baby Face》一幕就得到讚賞。

TVB台慶失敗點 3：直播質素差

網民批評TVB是次直播不時出現窒機嘅情況，覺得可能係條cam線有問題；又狠批攝影師角度拎得唔好：「CAMman係咪手痕，係咁轉黎轉去」、「呢個年代啲cam係咪輕得滯，拉遠拉近好似好難控制咁嘅」。

TVB台慶失敗點 4：台慶似夜總會？

張曦雯帶領黃嘉雯、葉蒨文、李芷晴、梁超怡、郭珮文等30多位女藝員以性感Bling Bling露肚舞衣登場，大跳辣身舞，相當養眼。不過，有網民覺得畫面似夜總會現場：「好多小朋友睇緊㗎」。

TVB台慶失敗點 5：年年賣慘

台慶Part 5主題為「代代傳承」嘅「值得被看見的凡星」，邀請到47位默默耕耘及為夢想努力嘅新一代藝人演唱歌舞劇，又於台上大談感言。最後更頒發由全台藝人總動員投選嘅「全台力撐潛質女 / 男藝人」獎項。部分網民覺得呢Part好感動，但部分網民就覺得年年總帶一Part係賣慘：「賣慘賣到打冷震」、「喊苦喊忽賀台慶」、「曾志偉揸莊之後年年都有part賣慘，以前台慶係笑哈哈冇冷場 依家台慶就賣情懷賣煽情，153 總經理後次次都搞呢壇嘢」等等。