側田珠海演唱會被稱「大排檔演唱會」 膠凳加座位前方白牆遮視線：側過側田

側田日前（3日）於珠海國際航展中心舉行《第一秒巡迴演唱會-珠海站》，演繹《UPSIDEDOWN》、《美麗之最》等陪伴歌迷成長嘅經典作品。雖然以唱功見稱嘅側田保持一貫水準，但好多觀眾事後都喺小紅書抱怨今次演唱會場地安排極差，更將其稱為「大排檔演唱會」。

部分睇完側田珠海演唱會嘅觀眾都喺小紅書發文，表示對於今次演唱會有好多嘢唔滿意。首先，網民對於個唱場地極不滿，演唱會喺珠海國際航展中心舉行，亦係首個獲准於該地舉行嘅歌手演唱會，有網民就表示建議該場地唔好再舉辦歌手演唱會；指原因在於地點極遠，加上週末路上車多，須花上許多時間前往。不過重點在於場地通風和空調不足，當晚感到超級悶熱，而且場地毗鄰珠海機場，加上音響設備未能帶來好好嘅聽覺效果，網民紛紛表示音響刺耳，演出期間又不間斷聽到飛機起飛聲音，甚至指比舞台聲音更大。

另外，網民對於側田珠海演唱會視覺效果同樣未感到滿意，雖然演唱會門票票價定於人民幣380、580、780、980及1,280元，但場地未有任何階梯，網民表示除非坐喺前排，否則前面都係人頭，好多位置只能一直抬頭睇電子屏幕，而且右邊座位位置更有一座白牆，遮擋前方視線，有網民就笑言：「側過側田吧」，加上所用嘅係「大排檔膠凳」，擁擠又坐得唔舒服，形容如同臨時搭建一樣：「沒看台，就是臨時搭建的舞台，感覺就像鄉鎮文藝表演」，唔少網民都留言指演唱會場地如同大排檔或者學校表演場地一樣，完全唔似演唱會該有嘅規模：「自己朋友圈都不敢發」、「我坐980第一排，個音響震到耳屎都出。場地問題，坐後面確實係慘」、「花了演唱會的錢看了一場鄉村音樂節，珠海這個名聲逗臭了」、「想知道有人喊退票嗎」、「佛山有一家海鮮大排檔，感覺比這大還好」、「救命？這是學校文藝表演場地嗎，心痛買票的朋友」、「這是演唱會嗎，這明明是普通場館」、「農村看戲的感覺」，不過有網民就話幸好有側田嘅唱功搭救：「睇到個場一開始我也心痛了自己一下，但他一開口我就原諒了所有，就是這麼沒出息」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！