傅穎韓國體驗色彩測試 變妝後竟撞樣鄧麗欣：我的塑造力很強

傅穎（Theresa）近年長居內地拍劇，因五官愈見精緻惹整容疑雲，不過傅穎曾強調自己因化妝技巧而令外表上有變化，直言會黐雙眼皮膠紙、假眼睫毛及畫下眼線去放大雙眼，又曾素顏拍片教觀眾化全妝，期間仲大力推鼻推翻網民對佢「間尺鼻」嘅整容質疑。然而，傅穎日前到韓國體驗色彩測試，完成後竟再次變樣，仲撞樣昔日Cookies隊友鄧麗欣（Stephy）。

傅穎到韓國體驗近期極流行嘅色彩測試，及嘗試韓系明星妝容，素顏上陣嘅佢膚質唔錯，面部仍帶有一定嘅光澤感。造型師將唔同顏色嘅布披喺傅穎身上尋找最適合佢嘅顏色，發現佢比較適合暖色調，髮色就以亞麻色最襯。傅穎變妝後，將頭髮捲成曲髮，亦對鏡頭甜笑，睇嚟相當滿意其妝容；傅穎更分享多張自拍照及歷年出道照片，表示自己塑造力強勁：「這麼多年來我改過很多不同的髮色，換過很多不同的造型。別人眼中我一直在進化，在換頭，可在我的認知裡，我的塑造力很強，在我身上有許多你意想不到的可能性。」唔少網民都覺得經變妝及換成啡色曲髮嘅傅穎成個唔同晒，更加撞樣鄧麗欣。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！