《價值觀不一樣，可以開花結果嗎？》

記得好耐之前有朋友問過我，兩個價值觀唔同嘅人可唔可以喺埋一齊，我一直都覺得係可以，而呢個朋友就一直覺得唔可以。佢講咗好多真實例子畀我聽，例如一對唔同信仰嘅情侶，一對有錢同窮嘅情侶等等⋯⋯到最後都因為價值觀唔一樣，選擇分手。

而我一直相信兩個人最初選擇喺埋一齊唔係偶然，都係被對方身上某種特質所吸引，有時正正就係因為見到對方同自己嘅唔同。例如你一直做開乖乖女，突然有個會帶你去見識另一個世界嘅小混混出現，你會因為對方同你嘅不同而被吸引。但到最後點解都係分手收場呢？當初明明你都好清楚對方同你嘅唔同，當初明明你就係畀對方嘅唔同所吸引⋯⋯

好多時係因為其中一方後來都係想改變對方。明明識佢嘅時候都知道佢喺一個自由奔放嘅人，但慢慢就想佢停低，慢慢就想綁住佢⋯⋯明明最初因為對方帶畀你一個唔同嘅世界而動心，但後來就想對方融入自己世界，跟住自己嘅步伐⋯⋯有一種人到最後都係想對方為自己而改變，又想去改變對方本來嘅樣子。於是分手時就將所有嘢歸究喺價值觀嘅不同。

呢個世界最難嘅一樣嘢就係「和而不同」，點樣去同自己唔同嘅東西去並存，點樣去容納對方嘅不同，真係好難。所以好多人會選擇直接去搵個同自己相似嘅人，但係難唔代表無可能，只係在於份愛夠唔夠大力啫。

港女友Facebook