全年大豐收！ 陳自瑤催運秘方 紅棗水照頭淋

陳自瑤去年事業運甚佳，接連獲好評兼贏得入行首個獎項，對於被指是無綫去年賺得最多的女藝人，她笑言不知賺幾多，但承認有獨門催旺秘訣，真的全年由頭紅到尾！

陳自瑤（YoYo）去年在綜藝節目《好聲好戲》及《識貨》表現令人喜出望外，又憑劇集《寶寶大過天》在台慶勇奪「最佳女配角」，事業有聲有色！今年3月，她將首度擔任「女一」，與羅子溢、黎諾懿等開拍新劇《婚後事》，開劇前的工作亦排得密麻麻，難怪盛傳是去年無綫賺得最多的女藝人，對此她笑說：「冇錯，咪就係盛傳囉！其實我真係唔知，要問公司高層先知，我諗其他人都好勁嘅！」

YoYo人氣旺，無奈不少工作受疫情影響，問有否覺得運氣來得不合時？她說：「如果話唔好彩，係咪應該話機會喺10年前嚟會更加好呢？所以冇得講。（冇咗幾多位數字酬勞？）冇計呀！少少啦！（去年有咩美中不足嘅地方？）再搵多啲錢啦！唔夠多，哈哈！」

娛樂圈講求人緣運，每逢農曆新年，YoYo都會買桃花及桔，更大爆朋友教的催運秘訣：「除咗用碌柚葉洗走衰氣之外，朋友仲教我用紅棗煲水，唔係用嚟飲喎！係沖完涼兜頭淋，咁就鴻運當頭，啲運由頭帶到落尾。我上年試過，今年當然繼續試啦！」

訓練女兒獨立

女兒快將10歲，問是否因工作而少了時間陪她？YoYo說：「少少啦！但唔嚴重，除咗工作，其他時間都用嚟陪佢，亦因為我上年太忙，佢學識處理好自己嘅功課。以前細個，我有同佢溫書，但佢啲功課開始深，我同佢講呢個係佢嘅責任，要自己搞掂，佢都漸漸獨立。有時佢有佢做功課，我咪喺側邊溫劇本囉！」