【全民造星3】出局旨呈有10億身家 阿媽係上市公司主席

《全民造星III》開始進入30強淘汰賽，上一round A組輸咗終極一戰，導師林二汶要一次過踢6名組員出局。其中一位被out嘅鄺旨呈，本身係樂隊享樂團成員，但最為人討論嘅係佢副身家！

旨呈嘅樂隊享樂團2013年出道，七年來作品唔多，稍為為人記得嘅係同沈震軒、莫凱謙合唱嘅《不枉》。做音樂搵食難，不過旨呈家底夠厚，《全民造星III》初選時都提過佢有10億身家，皆因旨呈媽咪就係上市公司現代健康科技（前稱現代美容）創辦人兼主席曾裕。

今年58歲的曾裕本身經歷甚為傳奇，幼年時因為父親嗜賭，與母親相依為命。曾裕有過三段婚姻，1986年同第二任髮型師丈夫、亦即係旨呈爸爸，拎住3萬蚊喺銅鑼灣開設「前鋪後居」髮廊兼美容院，後來得到闊太賞識，合資擴充美容院，自此生意越做越大，2006年喺港交所主板上市。曾裕同姓鄺前夫1998年離婚之後，2000年結識比佢年輕13年嘅新加坡演員李守義，兩人之後結婚。

根據過去報導，2012年時曾裕住喺赤柱村道大屋，當時市值2億，屋內仲泊咗好幾部名貴跑車。貴為阿仔，旨呈自然有份揸，不過喺2006年，年僅22歲嘅旨呈揸住過百萬嘅保時捷四驅車去滑水，但喺東區走廊被另一架失控私家車撞到，架靚車損毀嚴重，但係旨呈事後話最可惜係冇得去滑水！

因為呢宗車禍外界又對旨呈多咗了解︰中五程度嘅旨呈係阿媽曾裕所擁有多間公司嘅董事，但係旨呈未入行前反而去咗做健身教練。而喺2017年，曾裕同埋旨呈以公司名義，作價1億1500萬買入中環一個寫字樓全層單位。翻查資料，曾裕唔少物業都透過類似形式購入，難怪旨呈俾人話副成家億億聲！

但係旨呈都講過，同屋企財政獨立，所以自食其力，仲強調自己冇錢，都係搭港鐵返工。旨呈亦冇問過媽媽資助音樂事業，希望好似媽咪咁靠自己賺錢。而家佢會做音樂同幫手打理公司，因為可以發展理想之餘又陪到媽媽。