全民造星4｜望打造全能女團與MIRROR同台 花姐視《聲夢傳奇》為學習對象？

ViuTV選秀節目《全民造星》成功掀起話題，更捧紅兩隊人氣男團MIRROR及ERROR，日前《全民造星IV》正式公開招募，即日起至7月9日都可以網上報名，不過有別於過去3屆，今屆只接受女生參與，務求打造「全能女團」，將來可以同MIRROR及ERROR炸爆舞台，ViuTV公布梁祖堯、許廷鏗將出任《全民造星IV》導師，而上年有份擔任《全民造星III》導師嘅林二汶已口頭請辭，導師組合嘅搭配加上「全女班」參加者，網民似乎對今屆無咩太大興趣。

一班網民仲話成班女仔一定多是非，擔心花姐會被激親，留言：「d女仔日日同花姐講是非，爭寵，已經夠哂煩啦」、「搞女團咁恐怖？今次仲唔係叫Horror？」、「攪女團仲大鑊過宮心計。留位食花生」、「如果搞女團，我會減少睇ViuTV」等等。批評以外，有網民仲畀建議花姐，話希望唔好又係做馬搵埋晒啲網紅KOL參加，講到重新出發，但其實係比多次機會自己將《全民造星》無限輪迴。

網民同時提議無綫可將《聲夢傳奇》炎明熹（Gigi）、姚焯菲（Chantel）、鍾柔美（Yumi）及詹天文（Windy）組女團對撼《全民造星IV》。對於網民不時將《聲夢傳奇》同《全民造星》比較，無綫出身嘅花姐亦表示自己會睇晒《聲夢傳奇》，因為唔想撞橋，仲話無綫嘅導師同製作都可能比ViuTV優勝，可以學習佢哋好嘅嘢。花姐早前接受傳媒訪問，指將考慮《全民造星IV》加入戲劇元素，參賽者互鬥演技。過去ViuTV都舉辦過《最後一屆口罩小姐選舉》及熱播中嘅《造美人》，雖然好似幾睇頭，引起話題，但始終未捧紅到一眾參賽者，唔知《全民造星IV》又會唔會成功？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！