冇得去叱咤記者會 P1X3L三子IG出PO呻 網民留言支持兼戥唔抵

臨近年尾，又係各大音樂頒獎典禮派發成績表嘅日子，「2021年度叱咤樂壇流行榜頒獎典禮」喺噚日（8日）下午開記者會，超過60個歌手單位都會到場，包括張敬軒、MIRROR、林家謙、許廷鏗及謝安琪等等，場面相當熱鬧。大會宣布今屆頒獎禮將會頒發49個獎項，當中包括將以往「叱咤生力軍金、銀、銅」3個獎變成「叱咤樂壇生力軍男、女及組合金、銀、銅」9個獎。大批候選新人都有出席記者會拉票，不過跳唱組合P1X3L就未見蹤影，佢哋更各自喺IG出Story大呻無得去記招，結果引起網民關注。

吳啟洋（Phoebus）﹑葉振弘（Marco）和歐鎮灝（George）今年以P1X3L成員身份出道，而出道作品《Braceless》亦曾登上「903專業推介」第9位，之後都未有其他音樂作品派台。雖然佢哋係今年嘅新人，不過就未有出席記招，佢哋各自仲喺IG出Story大呻無得去記招。Phoebus留言話：「點解會係咁，一直也沒有一刻停止過，花光了力氣，連入場券也無緣。」；George則留言話：「當看見一班新人可以同台出席，但偏偏沒有我們，係真係難受......我哋都想被認可為今年音樂新人。」；而Marco亦有簡單留言：「我都想黎架。」

三子出PO後隨即引起網民注意，紛紛留言為佢哋打氣，例如「支持P1X3L 去叱吒爭生力軍組合獎」、「我都諗緊，點解叱吒見唔到你地㗎？新人組合獎，你地一定有得爭喎」、「其實今年都無咩新組合 佢地攞銅獎絕對ok喎」、「佢哋真係值得一個獎 七師傅快啲幫下佢哋」、「其實呢個組合真心慘」及「佢地三個值得入圍既​​」等等。

點解P1X3L缺席記招呢？環球唱片喺接受傳媒查詢時就話因P1X3L工作撞期，而未能出席記招。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！