【再見747】波音747兩年後停產 最後一架A380正組裝

今年肺炎疫情之下旅遊業大受打擊，大家都知航空公司一定損失慘重，不過未必有太多人關心飛機製造商。目前全球最大兩間生產商分別係波音及空中巴士，日前波音就宣佈旗下最具代表性機型747 將於2022年停產，正式成為歷史。

服役50年 747停產原因係？

747為波音於1970開始投入服務嘅機型，於1968年首相亮相後，成為全球首架大型客機，幾乎全球各大航空公司都有購入，而且經歷半世紀以來仍然係好受歡迎嘅機型，今次波音宣佈2022年將正式停產747， 除咗因為新冠肺炎下各航空公司生意大受影響，已經3個月零訂單，另一大原因竟然係科技進步之下，747比新型客機用油量要高，因此有唔少航空公司例如英國航空、澳洲航空都先後於去年決定停用747載客。

50年以來總共生產1,571架747客機，目前波音尚有15架747訂單要交付，其實自2016年開始因為747訂單大減，全年只有6架747訂單，波音已經係「造一架，蝕一架」，每造一架就要蝕4千萬美金，所以停產都可以話係意料之內。

A380將停產 正組裝最後一架

另一巨頭空中巴士，相信無人不識佢哋架「巨無霸」A380喇，不過原來A380於本年6月17已經開始組裝最後一架飛機，下年完成後亦唔會再有新機出現。2005出廠首航嘅A380， 為最大載客量客機可以載856人，可惜十多年嚟只賣出251架，基本上完全收支不成正比。A380由於用油量大、體積大，只有大型航空公司願意購買，而且全球只有60個機場夠大可以讓A380起飛降落，限制其使用情況。另一大原因係廉航等崛起，更令航空公司減少使用大型飛機，最終A380亦會成為歷史。

疫後旅行新趨勢 最新主打機型會係？

新冠肺炎之後嘅旅遊趨勢，唔少專家推斷都會係以短途、點對點為主，預計幾年內長途旅行未必有大需求，因此各大航空公司都打算減少大型客機而改用中小型客機，至於未來最主打嘅機型會係咩呢？波音去年就向超音速客機開發商Aerion注資，目前研究中嘅超音速AS2客機，最高時速可以去到1,610公里，比目前飛機快70%！不過AS2主要係研發作為商用及私人飛機，未算係民用客機，所以波音目前「機王」就係中型客機777X，而空中巴士同類熱賣中型機A350， 兩者都好合乎疫後旅行者中、短途旅行嘅需要。

不過空中巴士仲有「秘密武器」，就係號稱「未來客機」嘅Maveric，其外型尤如軍事用轟炸機，而且線條、外型都充滿未來感，而且用油量比目前飛機減少20%，2017年開始研究，但未知幾時可以啟用，主要原因係Maveric外型同傳統飛機完全唔同，要應用於民用上，要通過各大機場測試及民航部門嘅監管，估計可能要長達10多年呢，期待！

（8: 空中巴士研發中嘅未來客機Maveric，外型極為突破。）

（9: 號稱用油量可以減少20%，充滿未來感！）