雅虎香港新聞 【判決前夕】朱耀明：香港政府眼中冇香港人，就值得你奮鬥
2014年雨傘運動9人被控公眾妨擾罪，案件明天（9日）宣判。自審訊結束後已經近四個月，9人明天將在庭上再聚首。「佔中三子」之一的朱耀明，30年來都是支聯會的骨幹成員，但今年他或未能在六四30周年到維園舉起燭光。大半生心懷大中華情懷的朱牧，如今寄語香港人：「你今日睇香港特區政府，有乜嘢為香港人？而家香港政府眼中係冇香港人，你其實就值得奮鬥。」
眾新聞在判決前夕訪問九子，問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是朱耀明的回應：
審訊結束（12月14日）至今近4個月，怎樣運用這段裁決前的日子？
因為我喺呢度（柴灣浸信會）仲有好多工作做，所以呢個幾月，我要交接晒啲工作，即係社會服務、學校同埋健康中心，我要交代清楚邊個去做。仲有多啲時間陪個孫、陪屋企人，所以準備就無乜準備。法官一判，坐就坐架啦，無得準備嘅其實，等律師話仲可以做啲乜。
4月9日有可能還柙，做了甚麼準備？
我兩個禮拜前買咗呢對鞋，即時收柙嘅時候，著嘅鞋唔可以有鞋帶。所以我兩個禮拜前就要著習慣佢，唔使到時候逼腳。我又買咗條橡筋褲，因為唔可以有皮帶，佢會攞開你皮帶，褲頭鬆就會甩褲，所以要橡筋褲頭。
因為食緊啲藥，醫生要開定啲藥方，即係話畀監獄方面聽我食緊咩藥。我都食緊6、7種藥，所以要畀醫生證明。有兩種說法，有啲話可以帶藥入去，有啲話唔能夠帶藥入去，但係你食開咩藥一定要有醫生證明。佢哋就執藥畀你，呢啲係我嘅準備。
至於話記掛呢，我真係好記掛屋企人。我原本2010年退休，想陪太太多啲，同我個孫玩，因為到佢十幾歲嘅時候，好難同佢哋玩，呢個時間係最好玩嘅時間。我帶佢哋游水。係唔捨得，但呢個係準備咗嘅，呢個坐監嘅可能性。所以我哋係願意坐嘅，公民抗命，從Day 1開始就要付代價。
（朱師母擔心嗎？）我哋都充分分享。我哋嘅行動唔獲得太太嘅支持，就好難捱落去。正常都會擔心，我早前先覆診，即係身體頂唔頂得順都唔知。我2008年做過大手術，其實有啲後遺症，我割咗11吋大腸，所以腸嘅移動呢，有時移動得唔好就會腹痛，有時佢黏住腹膜又會痛。我9月開始腹痛得好厲害，做好多檢查，無辦法，腸做過手術。
我都準備好咗，日日都游水，鍛練好個身體，又有人教我點樣坐喺度都可以運動，即係入到去無水游架嘛。（飲食上？）我又無乜嘅，我都做過露宿者服務，乜都捱過，食物能夠支持到我嘅生命就得，我無乜要求。當然，無咗自由一定唔同。
我其實好怕禁制嘅，坐監我係驚嘅。我好怕，我連坐飛機都唔鍾意，要坐aisle seat，因為可以活動。禁閉式嘅嘢對我嚟講，其實係一種焦慮嚟嘅。不過都要克服啦，參與呢個運動本身就慢慢要嘗試克服。
（悼念六四？）入咗獄，睇吓入面有乜嘢能夠做到，因為我唔知入面有咩。點解17/18年我會去海外訪問（到歐美探望民運人士），就係還我心願。我記掛嘅人，特別係我心裡面成日記掛嘅人，我都見佢哋一次。呢個就係我另外一種悼念方式，見吓啲想見嘅人，彼此安慰、鼓勵，呢個都係我嘅心意。
你覺得裁決對於香港社會的意義是甚麼？
呢個裁決本身對香港嘅未來，我覺得個影響就大喇。即係話呢，示威遊行、你叫口號同你的言論係會受約制。呢個罪名嘅判決，唔係淨係我哋三個人，係關乎香港未來嘅言論自由同政制發展，係好重要。
如果悲觀去睇，假如我哋呢九個人咁樣去坐監，為著一個民主政制去坐監，若果引發唔起同情，或者觸動唔到人心，咁我覺得香港都無乜希望。即係話呢，我哋已經死心。其實我唔想人死心，對香港嘅前途絕望，其實係最慘嘅。
而家我哋被政府㩒住，佢要乜就有乜。你睇，香港已經逼爆喇，十幾年嚟逼爆，我從1984年開始就爭取全民退休保障，然後十幾年前話護養院唔掂，好多人等唔到3年就已經死咗，但今日一樣。其實政府眼中無人民，人民嘅生死，你都無顧到。私營骨灰龕又搞唔掂，你扔錢落大海又得喎。總之，香港而家，生喺一個百幾尺嘅地方，死咗之後無以為葬。生老病死，香港政府關心你咩？
而家香港政府眼中係無香港人嘅，你其實就值得奮鬥。
你今日睇香港特區政府，有乜嘢為香港人？講親就大橋、人工島，講真30年之後係點？30年之後，講嘢嗰啲人都唔知存唔存在。但係，香港目前人民生活喺水深火熱之中，你同我講大灣區，呢個政府眼中有無香港人、有無人民？
假如佢哋眼中有人民嘅話，講嘢就唔會咁涼薄，政策推出嚟就唔會離我哋咁遠。所以，我哋審判結果，就係對香港未來嘅民主發展同埋民生、對言論自由都有重大影響。我而家為乜啫？我哋係為普選行政長官，我哋要爭取一個公平嘅制度。我哋要咩啫？就係要公平咁簡單。
如果呢個政府無公平，其實唔會有穩定生活。而家好喇，（修訂《逃犯條例》）商家出聲你話有得傾，沉默嘅大多數人民點呀、公唔公道啫其實？即係話整個社會嘅道德、秩序喺度被沖散緊，呢個先係嚴重，我哋就係想維護一個公平嘅制度。若然一個公平嘅制度都維持唔到，咁呢個係一個好荒謬嘅繁榮，呢個只係有錢人嘅繁榮，人民仲係被壓制、受苦。
觀看原文： 按此連結
