前DJ爆料 高層施壓迫主持播指定歌曲 恥笑港台「樂壇寄生蟲咋」

有傳媒爆料指，香港電台高層口頭向DJ禁播達十個歌手／組合單位嘅歌曲，仲要係新舊歌曲一律禁播。「有幸」入圍嘅包括黃耀明、何韻詩、Rubberband、C AllStar、達明一派、Dear Jane、方皓玟、Serrini、謝安琪、許廷鏗。港台回應傳媒時表示，一直支持本地中文流行音樂發展，節目主持以專業角度選擇配合節目的歌曲播放，但就無明確否認禁播某啲歌手組合嘅歌。

曾經喺港台第二台主持音樂節目嘅梁德輝(Eric），喺社交平台發帖文大爆在職時被「指點」播歌嘅內幕！

Eric表示「因為播歌俾人照肺實在太常見」，原因千奇百怪，例如播洪卓立嘅《黑心King》就因為高層認為首歌怪而被鬧。「試過播藍奕邦盧凱彤俾人照肺，話因為佢哋啲歌唔主流會趕走聽眾；試過播雞餅（編按︰本地樂隊雞蛋蒸肉餅）俾人照肺，原因係『你明㗎啦』；試過播林海峰軟硬俾人照肺，話因為人哋係903（商台）」。

Eric仲大爆電台高層指明，要喺所有節目播某首歌。「播完仲要send whatsapp俾監製證明，以前亦有台長話pick list （主打歌名單）打星果首一定要播，Pick list五首俾面點都要播一首，有幾自由啫；亦試過有副台長打嚟問點解唔支持吓某某歌手，笑住話『我今日想聽到邊首歌』。」

港台回應「禁播名單」時強調專業，但係Eric踢爆商討「中文歌曲龍虎榜」名單嘅會議成員當中，冇幾多個做過主持有聽開歌，佢舉例方大同嘅歌曲Lights Up明明係英文歌，居然打入「中文歌曲龍虎榜」。而ToNick唱到街知巷聞嘅《長相廝守》，港台遲咗幾個月先力谷上三甲，似乎唔夠貼市。

Eric強調唔知有冇禁播名單，不過認為港台嘅影響力大不如前，被禁播都冇咩損失，佢亦質疑4月TVB同港台合辦嘅《香港金曲頒獎典禮》對後者嘅意義，「兩個機構，個榜不嬲評分機制唔同，如果你話年尾頒獎禮搞個新機制，咁個個星期六中文歌曲龍虎榜仲做嚟把x呀？」。Eric更批評「呢個機構入面班公務員大部分早就爛泥一堆」，最後以「港台？樂壇寄生蟲咋。」作結。

梁德輝2004年加入港台，主持過二台節目Gimme 5、音樂節目《騷動音樂》、《隨機播放》等，2020年離開港台轉職做健身教練。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！