【半澤直樹2】唔止好戲 劇中演員學歷勁 堺雅人讀中國文學 大和田名校畢業

大熱日劇《半澤直樹2》去到第9集，就快大結局，繼續睇到觀眾好肉緊！放心，我地唔會劇透！《半澤直樹2》有唔少實力派演員參演，佢地好戲之餘原來仲係高材生，原來堺雅人大學揀主修科係有原因。

堺雅人（半澤直樹）

喺演藝界捱咗好多年先出頭，堺雅人話試過窮到路邊執蒲公英當菜食，仲要拎壽司店海報貼喺屋企，幻想食緊壽司。入行前嘅堺雅人係日本名牌大學早稻田嘅學生，主修中國文學，難怪之前佢拍劇要講普通話對白都講得有板有眼。入得早稻田都唔簡單，但係本來堺雅人想讀另一間國立大學，不過要考入呢間學校就要參加數學考試，而呢科正正係「半澤」嘅死穴。

堺雅人中學時代已經醉心話劇，入大學之後更加成為劇社台柱，結果未畢業就決定入行，搞到被父母「閂水喉」。

香川照之（大和田）

由上一輯已經「烚」半澤嘅大和田睇到人火滾，飾演佢嘅香川照之實力非凡，多次獲得男配角獎提名，可以話係綠葉之王。香川照之父母都係演員，而佢年青時就讀日本排名第一嘅東京大學，畢業於文學部社會心理學系。雖則出身名校，但係香川決心成為演員，喺畢業第二年就有機會參演NHK大河劇《春日局》正式出道。

北大路欣也（中野渡謙）

有睇第9集會都會對中野渡行長咬牙切齒。飾演嘅老牌演員北大路欣也今年77歲，13歲就入行﹐後來考入早稻田大學戲劇學系，畢業後加入劇團，至今演戲經驗超過50年。

市川猿之助（伊佐山泰二）

伊佐山原本係大和田嘅得意門生，後來同「師傅」決裂，之後又多次想跣半澤不成反而被踢爆。香港觀眾冇咩睇過市川猿之助演出唔出奇，不過佢都係另一位劇壇高手。屋企係歌舞伎世家，市川猿之助5歲就上台演出，畢業於名校慶應義塾大學，主修日本文學。

渡真利忍(及川光博)

半澤直樹喺銀行內少數好友，及川光博本來以歌手身份出道，後來先至有較多嘅劇集演出。雖然母校成城大學比起東大、早稻田等唔算名校，但係及川讀嘅係法律系，冇返咁上下叻都搞唔掂。