台版吳浩康 男星街市擺檔賣雞被指「淪落」 直認放不下身段

吳浩康去年離開英皇之後，化身成為「職安真漢子」做地盤養家，唔少人讚Deep能屈能伸，亦當堂令佢某位舊同事相形見絀。

娛樂事業越來越難做，退下幕前回到凡間打工搵食嘅，唔止吳浩康一個。台灣男藝人沈建宏近期被媒體報導，踢爆佢喺街市雞檔賣雞腿，而報導標題就以「心酸」、「淪落」嚟形容曾經係靚仔偶像嘅沈建宏。

沈建宏8歲參加綜藝節目《我猜我猜我猜猜猜》嘅最靚仔小學生選舉而被發掘，十歲正式出道拍劇，仲成為何潤東契仔。沈建宏一度加入男團AK及元氣G-Boys，甚至去過韓國發展仲出過碟。同唔少藝人一樣，沈建宏早幾年到內地發展，拍劇、帶貨直播都做過，然後因為服兵役而返台，退役後繼續幕前演出，同時仲做埋醫美、開Pilates教室等生意。

講咗幾行字嘅經歷，其實沈建宏先31歲。

報導出街之後，沈建宏寫咗篇文解釋點解賣雞 － 舊年10月經朋友介紹去街市賣雞，然後決定自己擺檔。佢都直言「一開始還有點放不太下身段及面子」，畢竟自己做咗20年藝人，冇咩打工機會，「除了演戲、唱歌、跳舞之外，我就像個生活白癡」。而經過3個月擺檔生活之後，沈建宏見識到普羅大眾嘅生活風景。

沈建宏個post有呢一句，「也想過，若有一天，沒當個藝人了，自己是否還能順利做其他事情呢？」。當好多路人喺網上以不同形式成為名人，其實藝人都要學吓如何成為路人 － 唔止心境，仲有搵食技能，同埋街頭智慧。

不過我都係好想知點解吳浩康個舊同事仲係搵唔到食呢？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！