叱咤年中預測 鄭欣宜有望拎女歌手金獎 MIRROR或成大贏家

今年多咗人留意香港樂壇，而計算商台播放率嘅「903專業推介」已經公布第32周排名，亦即大約全年3份2嘅成績，從中可以初步預測元旦嘅「叱咤樂壇流行榜頒獎典禮」多項專業推介大獎得主誰屬。

生力軍 有冠軍歌都未夠贏

今年生力軍競爭超激烈！多年來，新人只要有一首冠軍歌在手，都好大機會拎到生力軍金獎，但係今年3位男新人曾比特(Mike)、呂爵安(Edan)同張天賦(MC)各有一首冠軍歌，意味其中2位可能同金獎無緣。除咗呢3位之外，得到過三甲嘅新人仲有ERROR成員肥仔、張蔓姿同Kerryta，佢地第二／三首歌嘅成績對爭獎舉足輕重。

男歌手 張敬軒林家謙佔優勢 銅獎打崩頭

男歌手當中，張敬軒有2首歌Sweet Escape及《俏郎君》拎過冠軍﹐而去年銅獎得主林家謙亦有《時光倒流一句話》及《神奇的糊塗魔藥》2首冠軍歌，不過《時》隔年上榜，計算上比張敬軒稍為落後。至於銅獎競爭估計好激烈，單單係MIRROR成員就有姜濤、Jer（柳應廷）同Edan各有一首冠軍歌，上年銀獎得主馮允謙都有一首，而且已經派新歌《因愛之罪名》上台，男歌手們應該要鬥到年尾先分出高下。

女歌手－ 欣宜三甲穩陣 有望首度奪金

現時為止只有鄭欣宜已經有3首冠軍歌（《小夜燈》、@princejoyce及《先哭為敬》），即使《小》係跨年上榜但相信對欣宜打入三甲、甚至拎金獎無太大影響。欣宜暫時最大對手會係容祖兒，年初嘅《東京人壽》連續2星期冠軍之外仲有三甲歌《煙花紀》，要視乎下半年祖兒會否再次發功。去年三甲AGA、陳蕾及謝安琪當中，只有Kay以《離不開》得到冠軍，而衛蘭亦有一冠一亞嘅成績，會唔會今年三甲同上年完全唔同人選？

組合－ MIRROR大戰C ALLSTAR

MIRROR好紅大家都知，但又係咪叱咤金必然之選？鏡仔今年第一plug WARRIOR冧莊2星期冠軍，問鼎叱咤十大冇難度，只係睇下可唔可以爭埋全年播得最多嘅「至尊歌」。不過今年再次合體嘅C ALLSTAR都有2首冠軍歌《集合吧！地球保衛隊》及《留下來的人》，今期派台嘅《沒明日的恐懼》反應唔錯，但MIRROR同期派台嘅BOSS已經4度打入三甲位置，令現時MIRROR贏面稍勝一籌。銅獎暫時估計係Rubberband，佢地已經有「準冠軍歌」Ciao及跨年上榜冠軍歌《每道微小》，不過RB暫時未見仲有新歌派台。而近年氣勢唔錯嘅DEAR JANE至今得《聖馬力諾之心》上過亞軍，如果剩低時間嘅派台歌成績麻麻，就好有機會失落組合獎。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！