吳文忻丁父憂發文悼念 爸爸退休後變藝人曾拍美劇演妮歌潔曼老爺

正在抗癌嘅前港姐吳文忻（現名吳忻熹），尋日突然發文透露爸爸猝逝，Nathalie亦寫道消息對各人而言相當震撼（Papa, your sudden death today was such a big shock to everyone of us……）。

其後，吳文忻再發文提到靚仔爸爸嘅「第二人生」，原來吳父Edmund退休後回流香港，偶然被星探發掘拍廣告，文忻更陪爸爸試鏡，自此Edmund拍過唔少廣告，之後更獲邀演出妮歌潔曼在港拍攝嘅美劇Expats，喺劇中演妮歌潔曼嘅老爺！

曾經喺娛圈發展嘅吳文忻，喺悼文對爸爸嘅「遲來的星途」相當自豪，更寫道「絕對好成績過我」。文末文忻寄語「爸爸，你一路好走！我嘅第二人生現在才開始，放心！」。

Edmund參演嘅美劇Expats，2021年喺香港拍攝，講述女主角妮歌潔曼同老公及小朋友喺香港生活，後來妮歌細仔突然失蹤，加上唔同遭遇，展現外國人在港生活嘅矛盾。吳文忻喺IG分享咗劇中佢爸爸Edmund同妮歌潔曼嘅對手戲，Edmund講得一口流利英語，難怪會被相中。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！