吳日言IG分享16年前糧單揭TVB拍劇僅收$500 網民：呢啲嘢你情我願

由森美原創嘅都市戀愛劇劇集《森之愛情》於周六日晚深夜重播，全輯共10集共由唔同單元組成，男主角森美每個單元都會同唔同女星合作，分別有小儀、周勵淇、王菀之、吳日言、何韻詩、楊千嬅、蔡卓妍、鄧麗欣、薛凱琪等等。日前，吳日言於IG分享16年前嘅糧單，自爆當年僅收5百元，就連森美睇到後都親自回覆。

吳日言為第4單元《不如重新開始》女主角，與森美扮演情侶及上演一幕泳池求婚戲碼。吳日言於IG分享16年前所屬SILLY THING糧單，直言：「上個星期收到好多人通知，話電視見到我。HaHa 原來播返2007《森之愛情》。嘩！我真係好耐無上電視，依家唔識唱歌、演戲、做主持，淨係識煮飯、湊仔、接放學…」又以Hashtag表示：「#我唔使收月費#無意中發現當年人工 #有錢收已經算係咁 #放心我有儲起佢」。

糧單上面列明一系列工展會、酒吧演唱、萬聖節等活動，同時已遮住收入銀碼，唯獨《森之愛情》拍攝一行列明酬金為500港元，就連森美都有現身留言：「500，幸福幸福。」吳日言就把握機會R撈：「大哥繼續用我，好抵用。」不過，網民就唔係咁滿意吳日言呢個貌似公審行為，認為吳日言計漏咗被Silly Thing抽佣嘅金額：「大姐，呢張係silly thing糧單呀。不過衣家你又可以趁機抽水了」、「其實如果你覺得$500太少，你當時可以唔接（重點這個係你公司出嘅糧單，即係你公司覺得你只係值得咁多錢）！」、「當時應該冇乜人識佢，憑咩攞高人工？」、「只係收你500蚊就可以上TVB，抵咗你啦」、「呢啲嘢你情我願，嫌錢少可以唔拍。以佢嘅知名度，TVB畀佢做個單元女主角仲想點」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！