吳浩康IG分享地盤工作日常 面露笑容食40蚊地盤飯 網民：欣賞為家人努力拼搏嘅男人

吳浩康（Deep）喺娛樂圈打滾20年，上年與郭思琳奉子成婚並誕下兒子「撐撐」，上月喺社交網站宣布離開英皇娛樂。初為人父嘅佢而家除咗係獨立歌手及唱歌老師之外，仲到地盤工作賺錢養家。

近日吳浩康開始拍片分享地盤嘅工作日常，而最新嘅主題就係「地盤飯」，佢更寫上：「到底地盤飯係點嘅呢？平時我哋係點樣落order同攞飯嘅呢？幾多錢？品質係點？今次我介紹呢間係5星級服務嘅飯車，品質就留返俾各位師父去評價！但係唔知大家估唔估到當中有啲咩飯呢？各位工友開飯啦！#DeepLikeVlog #返工午飯實錄 #地盤飯 #飯車 #5星級服」

從片中所見，吳浩康當日喺淺水灣地盤工作，佢拍下嘅餐單所見，每一日有多款飯盒以供選擇，而每一盒飯連汽水只需40蚊。去到午飯時間佢就同一班工友一齊前往外賣車拎飯盒及汽水，而佢選擇咗支竹火腩飯，賣相睇落相當不俗，難怪佢都面露笑容及豎起拇指讚好食。

對於吳浩康為養家做地盤工，唔少網民都留言表示欣賞，例如「加油，佩服你拿得起，放得下既態度。真男人，唔係咁多人做得到。」、「好嘢，有決心！加油呀！我都由金融佬轉咗做紮鐵佬！」、「非常欣賞deep兄能屈能伸為家人努力」、「加油！好多野都係過程，階段性。你一定會做返你想做既野。」、「真男人，堅，撐得起！加油！」、「你呢個好爸爸有膊頭，有責任心，加油」、「加油呀，努力養妻活兒既男人最Man!注意安全」、「欣賞為家人努力拼搏嘅男人～加油！」、「加油！真男人，以前不是你的歌迷，現在是了」及「加油！從今之後可以叫你做『康師傅』了！」等等；有網民留言：「加油呀！到而家你首先入為主仲係我song list 到」，而佢就回覆透露好快會推出新歌。另外，歌手吳若希亦有喺呢個PO留言表示佩服佢：「真心佩服，我睇片都腳軟」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！