吳海昕加入娛樂圈受《狂舞派》啟發 新作《二月廿九》備受關注

由劉俊謙、吳海昕（Sofiee）及徐天佑主演嘅ViuTV愛情穿越劇《二月廿九》正在熱播中，劇情主要講述2月29日出生嘅Yeesa（吳海昕飾），喺2017年2月28日幫自己慶祝生日，點知意外穿越時空去到北海道，仲重新邂逅兩位未來人Ryan（徐天佑飾）同埋余家聰（劉俊謙飾）。劇集一出街，女主角吳海昕隨即獲網民關注。

Sofiee喺樹仁大學修讀英國語言文學，當時邊讀大學邊做空姐，空餘時間就會參演學生唔同嘅作品。因為電影《狂舞派》嘅出現，啟發咗佢嘅人生，令到佢跳出框框，決定加入娛樂圈！

2014年時佢放棄穩定嘅工作，決定去參選港姐。樣子甜美嘅Sofiee，喺參選期間一直被視為大熱，雖然最終三甲不入，但就獲得旅遊大使獎，兼有「民選港姐」之稱。喺參選港姐後，佢去咗紐約修讀電影系，當時學費及生活費對佢嚟講幾吃力。畢業之後返嚟香港，四出叩門搵演出機會。

辛苦嘅付出一定有回報，Sofiee除咗參與電影拍攝之外，佢仲有為港台及ViuTV主持節目及拍攝劇集，例如港台《獅子山下2016》、《火速救兵IV》、ViuTV《賤民20》、《理想國》、《教束》及《二月廿九》等等。睇完佢嘅演出之後，唔少網民都激讚佢演技有層次、令人眼前一亮及夠自然等等。