吸金力強 照追巴士 炎明熹慳得滯 花費500都嫌貴

藝人炎明熹出名慳家，竟笑指購物超過500元已「太貴」，自爆平日依然以公共交通工具代步，日前更與姑丈趕巴士，感激途人給予空間，未有索合照及簽名。

炎明熹（Gigi）與好姊妹姚焯菲（Chantel）昨日到屯門出席超市品牌活動，期間周嘉洛以特別嘉賓身份亮相。談到超市掃貨，Gigi即發揮慳家本色，直言希望趁機「儲糧」，對於即場獲贈5千元禮券，她笑說：「現金？可以儲錢？（購物禮券呀。）咁問吓屋企人有咩需要，通常姑媽用多啲。」她又自爆平日只會選購日用品：「有嘢氹到我買嘅，佢都好犀利，但如果太貴，我都未必會買。（點先叫貴？）500蚊囉。」

對於被指近半年收入近500萬，Gigi坦言：「有冇咁多？應該冇，要問屋企人先知，但錢財管理係公司負責。（好快實現到上車夢？）我諗仲需要一段時間，我對呢方面唔係好認識，所以要吸取多啲大家嘅意見，要再睇吓先。（傳你搬咗入豪宅住喎。）咁犀利？去咗邊間豪宅？冇，都係住番喺同一個地方。（你去睇樓？）最近都冇時間，絕對冇咁嘅事。」

聖誕接Job密密斟

談到被拍得獨自乘港鐵，Gigi解釋：「其實嗰個係好耐嘅事，當時仲參加緊比賽，不過依家我通常都仲係搭港鐵，試過同姑丈入電視城喺度趕巴士，如果坐私家車，都應該只係搭順風車。（真係好慳家喎！）還好，不過屋企人話我慳得滯。（搭公車多唔多被人認出？）大家都好好，即使認出我都會畀足夠嘅空間。」而Chantel同樣表示不清楚自己搵多少錢：「都係交番畀爸爸處理，我都唔知自己實質有幾多錢。」至於即將來臨的聖誕節，兩人有工作接洽中，但未落實，且準備交換禮物，而Gigi最難忘收過Chantel手寫的聖誕卡，大讚對方窩心。