呂方身型暴漲登台 60歲發福到唔見咗條頸

實力派歌手呂方1983年參加第二屆新秀歌唱大賽奪冠後入行，去年舉行入行40周年演唱會，擁有無數經典歌曲，其中《彎彎的月亮》、《朋友別哭》等喺兩岸三地廣受歡迎，可以話係香港樂壇其中一位低調高手。

早前有網民喺小紅書分享今年「登六」嘅呂方喺內地登台片段，片中所見呂方身型比以前澎漲唔少，更有網民覺得呂方發福到「唔見咗條頸」。同時睇返網民分享呂方2007年紅館演唱會嘅演出片段，當時呂方都仲keep得唔錯。

呂方2020年同年輕過佢16年嘅企業家伍惠寶(Rainbow)結婚，同年誕下女兒。升呢做老豆之後呂方盡現「幸福肥」，近年每次現身都被指身型日益橫練，但呂方不時喺微博分享跑步相，相信佢都有為健康努力。

呂方曾經同Do姐鄭裕玲交往16年，後來因為雙方都想尋求空間而和平分開。後來呂方喺2010年認識台灣女星歡歡（于佳卉）並交往一年，但因性格不合分開，而歡歡於2014年喺台灣寓所輕生。至於呂方太太Rainbow，去年10月被邵子風公開追數要求還款70萬元，雙方一度喺社交平台爆發罵戰。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！