告別2023｜戰友紛離港或入獄 90後區議員任滿離場：第一次也是最後一次｜Yahoo

「最開心就係2019年當選嗰一刻。」黃丹晴走到屯門山景社區會堂門外，還記得勝選那天在該處開香檳。接著是議員辦事處的「拆紅紙」儀式，他和一眾「屯門社區網絡」成員在門外握拳留影。轉眼4年，「屯門社區網絡」解散，區議會改制，黃丹晴亦不再尋求連任，「張相入面嘅人，應該得我同曾錦榮（龍門前區議員）可以喺香港自由身」。90後的黃丹晴笑言，這是他第一次擔任區議員，也應該是最後一次。

「可以做多啲嘢，但時間唔夠」

「總會係有啲不捨、忐忑嘅，不捨係因為覺得用個（區議員）身位可以做多啲嘢，但時間唔夠」。黃於12月31日卸任，議辦門外仍貼上1月份舉辦的活動，「我都成日同街坊講我唔係死，仲可以打電話搵我，我都願意繼續去服務」。

訪問當日，他和助理開始執拾辦公室，是不捨，也是黯然。「可能要用其他唔同嘅方式，最好服務之餘又可以搵到食」。任期剩下數天，有更實際的考量，「如果未到31號就走，一陣又話我無服務唔畀我claim錢咁點算！」

黃丹晴尚記得參選的初心，「除咗要喺立法會呢啲比較全港性嘅位置去宣揚理念之外，仲要喺社區紮根」。他指不少街坊願意了解及聽取地區領袖想法，希望藉此宣揚民主等理念，「深耕細作啲，係每一個參與團體應該要做嘅事」。他記得剛上任不久，有街坊稱之前未曾進入該區議辦，「上一任係閂晒門，搵佢都係打開木門唔開鐵閘」。如今他認為或多或少達成了參選的目標，「街坊提升咗對自己社區嘅關注度，對自己嘅權益例如法團著緊咗」，改變雖未至於翻天覆地，「但你總會見到少少改變，例如多咗人知道啲嘢（文件）唔可以亂咁簽名」。

首次參選就勝出，更擔任屯門區議會史上最年輕的副主席，黃丹晴每次開會前花很多時間準備，了解會議規則，「發覺唔係資深就一定熟規章……其實都唔關年資事，反而係睇大家對件事嘅態度」。他的議辦外貼上工作簡報，顯示他在區議會大會出席率為百分之百。

當選初期，黃丹晴把較多時間放在政治層面上，「難啲去完全兼顧個社區，呢個都係我覺得可以再做好啲嘅地方」。黃本來打算舉辦嘉年華活動維繫街坊感情，豈料遇上疫情；山景是老區，服務範疇是「守住」多於創新，「都唔會有啲咩大改變，都係幫街坊解決問題、講啲資訊」。他形容任內最大成就是協助法團改選，「算係透明開放咗」。

「希望佢哋喺我身後面」

12月下旬，黃丹晴的議辦舉辦閉幕典禮，不少街坊捧場，「佢哋都會過嚟攬晒咁，感受到街坊嘅愛」。黃笑言「喪事當喜事辦」，「橫掂日子都係咁過，不如開心啲」。他預備了Rap表演，亦請來北角前區議員李予信到場跳舞助興。典禮背景板圖片是2019年一班成功當選的年輕區議員，出席議辦「拆紅紙」儀式拍下的合照。相片當中的人，有些已移民，亦有人身陷囹圄，「我哋開始就係咁樣，到而家結束，都希望佢哋喺我身後面」。

本身是註冊社工的黃丹晴最初想過可能做兩至三屆區議員，可惜做過一屆就止步。「其實個制度係唔想畀你選，感覺唔到係畀緊我哋玩」。對於區議會候選人需獲得三會提名才可參選，他形容「harsh過立法會」，「已經去到不能接受嘅地步」。他亦指街坊了解他不再參選的決定，「大家都想我喺度，但呢樣都唔係我哋可以控制到嘅嘢」。為了生計，他將會搵工之餘，亦打算進軍YouTube界，拍vlog、學剪片。記者訪問他的那個星期，他更「一周三更」，即一連拍三條片，希望在網上繼續與街坊交流、分享生活。

不抱期望 何須失望

踏入2024年，區議會改頭換面，黃丹晴視之為一般行政機構，「我覺得已經冇一個監察力喺度，當原來議員係需要向區議會主席、即係民政專員去報告自己嘅工作，但係冇要求過向選民報告，即係你根本都唔需要向市民負責，你仲可以期望佢幫到人啲乜嘢、有咩用呢？」他形容新一屆區議會只是「一個逗糧嘅地方」，「唔會抱有咩太大期望，亦都唔需要失望」。

2023年的香港對黃丹晴而言，失去了很多人，也失去了國際地位，更失去了市民對社會的信心，「當呢個地方失去活力嘅時候，人民都不會再對呢度有咩期望」。他亦感謝一眾當年投票給他的街坊，「多謝佢哋俾個機會我去喺呢個位置，做咗好多好有意義嘅嘢，為咗答謝佢哋，都會盡可能繼續去幫助大家。回憶係寶貴，機會係得來不易，經歷係用錢買唔到。」有街坊認為他四年來成熟了不少，現年31歲的黃丹晴卻有另一番看法，「人愈大愈難有一個熱血嘅心，保持吓天真，有時係一件好事」。