呢度住吓嗰度住吓｜蒙嘉慧出山點名要Dee姐 保錡表現惹批評網民反應兩極：浪費咗個題材

蒙嘉慧與鄭伊健於2013年結婚，婚後蒙嘉慧減產，並於2019年與三位合夥人於福岡開設房地產公司，港日兩邊走。近日，蒙嘉慧復出幕前，與保錡及陳海寧（Dee姐）主持ViuTV節目《呢度住吓 嗰度住吓》，令其有一定追看性；不過，有網民就覺得保錡於節目表現差，所以即使蒙嘉慧罕有主持都唔想睇個節目。

蒙嘉慧於節目帶住保錡和Dee姐到北九州周圍住吓，不但去鄉下夜宿百年老屋、學做農夫落田摘菜、廢校Glamping兼放羊，更會到全九州最大嘅骨董市場擺檔等等，體驗「呢度住吓、嗰度住吓」。不過，保錡嘅表現卻引來批評；首先被批於節目內不停曬肌肉，睇到在場人士都好無奈，更被指唔認真及心不在焉。另外，保錡於參觀道場向一班小朋友大談黃色笑話，包括「吔咩嗲」、「儉摩芝」，聽到小朋友都嚇到發呆。

今次蒙嘉慧肯出山拍攝，全因Dee姐。Dee姐與鄭伊健合作《深宵閃避球》變得熟絡，更於一次到福岡旅行時探訪蒙嘉慧，二人因福岡名物牛腸鍋「一食如故」，於是當ViuTV搵蒙嘉慧合作時，佢就點名要Dee姐過嚟同佢一齊拍，觀眾亦大讚蒙嘉慧與Dee姐於《呢度住吓 嗰度住吓》互動得好好。反觀，唔少網民指蒙嘉慧與保錡嘅互動相當尷尬，保錡不斷提起蒙嘉慧喺電影《流氓師表》嘅角色「魯媚」，令蒙嘉慧都懶得回應。對於保錡呢次嘅表現，網民相當多意見，留言指要剪走保錡：「睇poki真係睇到好尷尬，點解死都要加poki落去？我想認真睇Yoyo」、「Poki做主持唔係好認真咁」、「可唔可以加班再剪過，剪走保錡」、「失禮嘅黃色說話，或無啦啦同日本人講中文」、「搵保錡做，浪費左個題材」、「成個節目未睇都失色了，就係保錡有份做，真係已經唔感興趣」、「我覺得保錡唔適合做呢個節目，完全融入唔到，又冇乜做功課，Viu都有責任，揀錯主持，唔適合佢」等等；但都有網民唔覺得保錡有問題：「保錡制造節目效果，笑到碌地，開心真係好簡單」、「我都係其中一個觀眾 唔太覺得佢有問題？！佢做節目不嬲都係咁㗎啦」、「鍾意睇既咪節目效果，唔鍾意既咪失禮囉，搵得佢拍就預左佢會講經架啦，佢正經反而先得人驚」、「要正經，就唔會搵佢啦」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！