周啟生鬧完林家謙廢青再發炮 點名呢位資深音樂人「欠缺努力 唔會好叻」

前輩級音樂人周啟生不時對後輩作多番批評惹起爭議，繼評擊陳蕾紅館演唱會彈結他甩皮甩骨、唱現場近乎離晒譜咁走音之後，日前又出post叫網友「大家選一男一女，你最唔要聽到佢唱歌嘅歌手」，其中一位網民點名林家謙，周啟生留言回應話「嗰條廢青我都麻麻哋鍾意！」而引起爭議。有網民回敬周啟生「廢青喺紅館開過七場演唱會，你呢?」。

引爆罵戰之後周啟生似乎仍未收火，再次出post表達立場。「今次嘅情況真係有啲特殊。如果大家曾經去過另外嗰幾個轉發咗我個post嘅post睇吓，你會發現成班唔講道理嘅x街冚xx，好似一群癲狗，有目的同埋組織咁圍住我嚟咬。我毫無保留，亦冇選擇，所以我無餘地咁樣同呢班x街開火！」。周啟生再對「廢青」一事作回應。「熟悉我嘅人都知我成日都叫我自己做80年代70年代嘅廢青代表，想搞事,唔該躝x遠啲！我鍾意講乜，我就講！」。此外周啟生再講出佢對林家謙嘅感受。「唱歌超級雄壯/咬字清晰/好有氣/但係天生太靚仔。彈琴簡直係低班馬，佢夠膽我收埋一隻手同佢一齊彈一隻歌！我講得出口，我唔會收：x你唔起呀？」，又另外喺留言指「補充一句，完全唔入流一個所謂音樂人，我唔覺得我鬧佢唔x起！何況冇鬧過！」。

周啟生喺樂壇多年，佢喺留言提到幾位喺音樂圈中相當有資歷，但遲過佢入行嘅「後輩」。「Joey Tang（鄧建明）係我帶佢出身嘅，徐阿勤（徐日勤）係我師弟，Sin立文（單立文）都係好早期幫過我喺錄音室彈嘢，全部都係我輩分以下嘅！如果我喺度講一聲，Joey Tang有領導才（能），彈結他有天份，但係欠缺努力，所以唔會好叻！你哋可以同返佢講、睇吓佢敢唔敢博（駁）我！」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！