周柏豪與黃之鋒早年合照引起熱議 接受陳百祥訪問：係一個幾大嘅誤會

有傳周柏豪喺上年被捲入政治風波，唔少內地網民質疑佢嘅政治立場，因而影響到佢北上發展。近日佢就上載咗一張抱住囡囡嘅相片，並留言讚內地抗疫措施及心存感激自己身為一個中國人。呢個PO一出就引起網民熱議。而最近喺網上亦瘋傳佢喺2014年與前香港眾志秘書長黃之鋒嘅合照，同樣引起大家熱烈討論。周柏豪喺接受陳百祥訪問時就為近日嘅事解畫。

喺訪問期間，周柏豪就為近日Facebook貼文講出自己嘅感受：「喺前日，我就PO咗一段自己嘅感受出嚟，咁就引嚟咗一啲嘅迴響，咁但係我自己嘅睇法係我爺爺嫲嫲、公公婆婆，其實都係內地以前走落嚟香港，我自己係一個中國人，我只係講出自己嘅感受，但係引嚟好大嘅反應，但係呢個係一個自由社會，我可以表達自己嘅感受，大家都可以批評其他人嘅感受，我自己純粹想表達呢一樣嘢。同埋一路之前大家可能對我有啲誤解，喺一啲政治嘅取向，我自己覺得我做藝人，我淨係好想唱好自己嘅歌，帶娛樂畀觀眾，同時我娛樂返我自己...但係喺過往嘅日子，令到大家唔開心之餘，大家嘅反應亦令到我唔識去處理，因為坦白講以前返學，無人教我所謂嘅危機處理，我自己遇到驚嘅事，我會好想自己去匿埋，咩都唔理，咩都唔解決，希望令到件事可以慢慢丟淡，但係原來呢個年代係唔可以，呢個年代係要勇於去表達自己嘅感受，令到大家去明白我以咩嘢嘅姿態，繼續喺幕前同大家見面。」

之後，陳百祥問周柏豪對黃之鋒及其呼籲外國制裁睇法，周柏豪就即刻強調自己唔認同：「首先，我自己當然唔同意佢嘅做法，我有一個想法就係唔同嘅理念，或者搵其他國家嘅人（陳百祥：來制裁），自己同阿媽嗌交，無理由搵隔離屋嗰個師奶嚟打自己阿媽架嘛，我自己會咁樣去諗，點都係自己同自己阿媽去傾好佢，或者本身都係要聽阿媽話架啦，呢個係孝順，我一定要提出呢樣嘢。所以係完全唔同意佢嘅理念同埋唔同意佢嘅做法，呢個就係我嘅立場，同埋我係完全反對暴力嘅行為。」

至於同黃之鋒嘅合照，周柏豪嘅解釋係：「係有呢張相，呢個係一個事實，但係呢張相其實係我2014年一個自己嘅紅館演唱會嘅後台，因為我哋嘅香港演唱會文化就係一做完就有好多人帶佢哋嘅朋友...喺混亂之間有好多人排隊，同事就安排一pair一pair咁樣影。...喺我嘅立場，我身為一個歌手，有人嚟邀請我合照，咁我唔理邊個，就算當時我知佢係咩人都好，我都唔會係處於一個你係咁樣嘅人，我唔會同你合照。喺2014年，坦白講我唔認識佢.....所以係一個幾大嘅誤會。」

最後，陳百祥問周柏豪對時下有一部份青年嘅諗法，周柏豪就話：「我覺得可能佢哋未必太過了解中國內地，即係呢一段，或者呢十年嘅變化。有好多嘅唔了解，而導致有好多嘅誤解。所以我覺得係需要時間去令到佢哋去明白，呢個世界，香港以外其實有好多嘅地方以經默默耕耘做緊自己嘅嘢，而唔會去自己搞亂自己。」

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！