單文柔用愛化解張寶兒認輸

·3 分鐘文章
一齊砌個心心,都係送畀老公仔o架啦!
一齊砌個心心,都係送畀老公仔o架啦!

已為人妻的單文柔、張寶兒,各自面對性格執着又有原則的老公陳展鵬及袁偉豪,只能以柔制剛去應付。當張寶兒指「袁生」很有主見,不能硬碰時,單文柔即驚訝謂:「我以為陳生已經係金字塔個頂!」不過,兩位嬌妻樂於挑戰「高峰」,以另類方法軟化老公。

2位型男太太張寶兒(Bowie)、單文柔(Phoebe)性格截然不同,前者屬理智型、有主見,自稱是「大女人」一名;至於後者明顯是感性型,愛得癡纏,開口埋口都「我老公話」,絕對是可愛人妻。說到展鵬與袁偉豪(Ben)都屬「大男人」時,Phoebe說:「我老公話佢唔係大男人,佢話佢對我冇要求(口架)!本身我都好有主見,但對住佢某程度輸咗少少!(你哋兩個老公都好執着!)吓!我覺得我老公已經係金字塔嘅頂端,原來一山還有一山高。」Bowie則說:「我哋係用軟性方式解決問題,我係好有主見,但袁生更有,所以冇得硬碰。(你輸咗?)係呀!我輸咗。」

被批評數學唔掂

問到老公平時有否特別的要求時,Bowie即大爆:「佢要我剪短頭髮,都堅持咗半年,有次去Staycation,佢又話:『其實你成日影咁多Fashion相,造型可以再特別啲,你把長頭髮實在太普通嘞!』我聽到之後就着火嘞!我係你老婆都咁唔特別?之後就發脾氣剪咗。」

Phoebe就指展鵬向來對她沒太多要求:「佢唔會直接要求我做一啲嘢,但言語間佢會話:『咦!你咁做會唔會好啲?』佢覺得我人生閱歷較淺,會提議我學一啲嘢,但我有自己諗法,經過一輪角力後,我覺得都可以試,係我想佢開心啲,唔一定我認同佢嘅諗法。(有冇鬧過交?)都有,都係好無聊,小事到一個飲水杯,佢就會講到你嘅性格、人生將來閱歷,佢話我要成長。如果真係好鍾意呢個人就要Tune一Tune呢啲位!」Phoebe又指老公要她學投資:「佢覺得我對數字冇乜概念,佢話:『其實你啲數係咪要識得計呢?』我初頭聽到都有少少嬲,但後來又覺得佢講得啱。」

Bowie曾打算領養

Phoebe已育有一個女兒,問到Bowie想不想生孩子時,她理智分析:「唔到我選擇,呢啲係上天一個緣分。以前我係諗住領養,但結婚後呢個念頭慢慢減退,因為袁生係獨仔,生一個就太寂寞,要生就生兩個,我會生嘅,但依家未有精神照顧小朋友。」接着Phoebe說:「生BB係要衝動嘅!(已準備生第2個?)想畀多1年、年半時間自己,做好依家嘅嘢先,我仲有好多嘢想做。」

單文柔有生多個的計劃,只是時間問題。
單文柔有生多個的計劃,只是時間問題。
張寶兒對着老公有時也會着火,不過愛會戰勝一切。
張寶兒對着老公有時也會着火,不過愛會戰勝一切。