國慶show延遲45分鐘 黃奕晨Dixon一人硬撐ViuTV直播獲讚賞︰觀眾都戥佢慘

國慶前夕晚上，旅遊事務署喺西九文化區藝術公園舉辦「新生代千人合唱賀國慶」，原本安排2099架無人機進行匯演，但因為設備受「電離層閃爍」嚴重干擾，活動由原本8時半延遲近45分鐘先開始，而無人機表演直播最終更以播放綵排片段代替。

當晚ViuTV都有進行直播，並由黃奕晨Dixon喺錄影廠做主持。本來Dixon只需要講下演出背景資料，將時間交俾現場就可以完成任務。但由於直播延遲，喺廠嘅Dixon要單人執生，除咗盡量介紹演出詳情之外，甚至要提醒出外睇show嘅觀眾要帶足夠嘅水、留意交通安排等。幕後人員就幫手插播多首MIRROR成員嘅MV過場，但係MV播完Dixon又要繼續搵嘢講，因為表演可能隨時開始，於是Dixon就連國慶假期有咩優惠都要介紹埋！

有網民喺社交平台發文，向黃奕晨表示「辛苦晒」、「做觀眾都戥佢無助」，唔少觀眾原來都留意到Dixon苦撐嘅情形，盛讚佢能夠保持笑容，做得好好，甚至話因此想睇返節目重溫！而黃奕晨亦都有留言回應話「應該嘅」。

35歲嘅黃奕晨Dixon係資深藝人夏雨嘅囝囝，喺加拿大生活過一段時間，更曾加入加拿大跆拳道國家隊。2013年夏雨西貢屋企被爆竊，跆拳道黑帶嘅Dixon出招擊退匪徒！Dixon 2016年加入ViuTV，主要擔任主持工作。黃奕晨曾經同女團Super Girl成員吳嘉熙拍拖2年，到2019年10月分手收場。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！