壓力大到失信心 湯洛雯呻星二代冇着數

·2 分鐘文章
湯洛雯雖然有個藝人父親,但不認為對她的事業有任何幫助。
湯洛雯雖然有個藝人父親,但不認為對她的事業有任何幫助。

湯洛雯當年選港姐背負「星二代」之名,令她壓力大到失自信,故以過來人身份寄語今年參選的關禮傑大女關楓馨,記得要放鬆心情!她自嘲沒後台,做足9年才捱到女一之位!

「靚湯」湯洛雯、蕭正楠、簡淑兒、阮兒等昨日出席《一笑渡凡間》宣傳活動,眾人在台上大玩遊戲,期間阿蕭、靚湯及簡淑兒玩夾波波遊戲,阮兒又施展一字馬。講到劇集踏入結局篇,靚湯及簡淑兒贊成原班人馬拍續集:「可以拍時裝版,講濟公穿越現代。」

支持關禮傑大女

提到新一屆港姐開鑼,選港姐出身又是男星湯鎮宗之女的靚湯表示,知道關禮傑大女關楓馨有參選,她說:「我唔識佢,但我識關禮傑,因為有合作過。(都係星二代,有咩心得畀佢?)要放鬆心情,我當年就係因為『星二代』呢個稱號,所以好大壓力,搞到冇自信。」靚湯又笑言:「好多人話我哋有後台,其實係冇,我就係人辦,做咗9年先有機會做女一,我覺得佢可能都係唔想大家覺得佢靠屋企,想靠自己努力,所以先嚟參選,所以會支持佢。」

講到男友馬國明新劇《寶寶大過天》開播,她未有時間觀看:「嗰時我哋同一時間開劇,我有時都會去探班,見到岑麗香同馬國明湊BB倒瀉籮蟹嘅樣,但岑麗香好啲。(睇到之後有冇刺激到你?)有呀,刺激到我唔想生,哈哈!」

蕭正楠被屈無奈

講到阿蕭之前與太太黃翠如因手勢涉及政治引起風波,他心情輕鬆表示:「呢啲事在所難免,如果大家只係cap嗰一秒真係控制唔到,大家睇晒條片就會知咩事。(有冇唔開心?)無奈,其實段片冇表達任何意思,只係享受跑步同影相作為紀念,但啲人要誤解我都冇辦法。」至於翠如祝福好友洪永城(Tony)結婚一文又被批太矯情,似寫給前度,他笑言:「Tony真係好剋佢,佢兩個喺埋一齊都冇好事發生。」

阮兒即場表演一字馬,技驚四座。
阮兒即場表演一字馬,技驚四座。
被靚湯與簡淑兒夾到實,蕭正楠個樣似乎有點吃不消。
被靚湯與簡淑兒夾到實,蕭正楠個樣似乎有點吃不消。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能