大叔的愛｜黃德斌中途轉基戀Edan 現實係長情專一好男人

日版《大叔的愛》2018年播出時紅遍亞洲，ViuTV早前向日方購買版權拍攝港版《大叔的愛》更搵嚟MIRROR成員Edan、Anson Lo同黃德斌飾演3大男主角。劇集籌備時已經引嚟好多網民討論，噚晚首播仲俾到好多驚喜觀眾。

喺1988年入讀藝員訓練班後入行嘅黃德斌，一向俾人好man好cool嘅感覺，多年來都係飾演剛強硬朗嘅角色，好似《火舞黃沙》宋東陽、《天與地》Ronnie及《刀下留人》葉常綠等嘅角色，可以話同少女心扯唔上任何關係。不過今次佢喺《大叔的愛》有破格演出，飾演上司翟國強KK，雖然有一個結婚20年嘅老婆Francesca（簡慕華飾），不過佢竟然中途轉基，鍾意咗下屬阿田（Edan飾）。喺劇中德斌背住老婆鍾意第二個，但現實生活中嘅佢其實係個長情又專一嘅男人。佢喺2018年與拍拖18年兼比佢年輕16歲嘅圈外女友Joyce結婚，婚後二人非常恩愛，除咗平日抽時間同老婆行街同踩單車之外，德斌更打本畀老婆喺尖沙嘴開時裝店。

首集德斌已經拎住玫瑰向Edan示愛：「田田 I LOVE YOU！」，佢怕羞充滿少女味嘅表情，加埋啲少女小動作真係好有喜感。佢嘅反差萌深得網民喜愛，紛紛留言大讚佢，例如「黃德斌咁剛強都做到呢d 角色仲要討好,真係勁放勁好演技!! 」、「好正 黃德斌 個形象真係完全同以往大反轉」、「德斌放得好開」、「黃德斌世一」、「黃德斌個年紀點解都可以咁可愛㗎！」、「德bun幾正，佢個大叔少女mode最正」及「估唔到德斌都做到搞笑，好吸引呀」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！