【大哥又中？】愛國紀錄片《厲害了，我的國》突然被禁

上面周不時有啲配合「主旋律」嘅電影上畫，淨係隨口都數得出《建國大業》、《建黨偉業》，仲有以商業片包裝但力sell國家強大嘅《戰狼》系列、《紅海行動》呢。

今年3月仲有套直情叫《厲害了，我的國》嘅紀錄片，由中央電視台紀錄片《輝煌中國》剪輯而成，展示國家主席習近平執政以來嘅國家成就，包括港珠澳大橋、神舟11號飛船等等。據報導話，《厲》喺內地影院上畫個幾月，票房就有成4億人民幣，成為內地上映最高票房嘅紀錄片。

套戲上畫過後，係時候掟上網路繼續「紅」起來，不過早幾日就有網路截圖，話內地巨型網媒喺深圳嘅分公司，收到中共中宣部公文，話「為營造和諧有序的網路播出環境」，要求將《厲害了，我的國》喺所有商業影片網站緊急下架。

一套內容咁正面宣傳國家成就嘅紀錄片，點解忽然下架？有專家就話可能因為呢期中美貿易戰嘅敏感時刻有關。不過另外有網友就突破盲腸，帶來另一種睇法。

佢地話，《厲害了，我的國》主題曲，係由成龍大哥主唱。素來都有網友話，大哥代言過嘅產品，都會出出地事。由VCD機到可樂，代言廣告出街之後，都係倒閉收場……

會唔會係成龍大哥個八字太勁，啲牌子受唔起先？咁不如拍套成龍紀錄片，叫《厲害了，我的哥》啦！