夫妻共事有學問 謝瑞麟女掌舵：一個Emoji化解衝突

本地商人謝瑞麟的家族生意，輾轉間來到他媳婦的手中。多年來公司業績發佈會，早已由她主持大局。外界或許以為，這是個「泊到好碼頭」的豪門少奶奶的故事，現實中，她本人正是能幹可靠的「好碼頭」。

大學電腦工程系畢業，嫁入謝家後續於IT界打滾，一做十年好享受。後來丈夫家族走入低谷，種種人算不如天算的往事，打破她認為倆夫妻事業要有「河水不犯井水」的界線，拼湊成今天的謝瑞麟主席兼行政總裁謝邱安儀（Annie）。

回想當初單人匹馬擔起謝瑞麟（417），對同事，她說要「將冰山劈開」；對共事的丈夫，冰山照劈，有技巧的劈，短訊與貼圖（sticker）是倆夫婦化解爭執的最佳方法。

放下老闆身段 「將冰山劈開」

「我冇預計過入珠寶行業，搞屋企生意，當時我同我先生都幾河水不犯井水，佢有佢珠寶生意，家族生意，我有我IT嘅事業，大家都好開心」，所說的當時已數到17年前。丈夫謝達峰早於2000年從已申請破產的父親手中接棒，後來為減輕另一半的工作重擔，Annie後來辭去IT工作加入謝瑞麟。起初，她一舉更新公司電腦系統，「用返老本行嘅能力，成間公司嘅系統全部換過晒一個world class嘅ERP系統（企業資源規劃系統）」。

看似安然渡過，謝家卻於2008年又再經歷巨變，老爺和丈夫因觸犯商業罪行被判入獄，「頂硬上」代替丈夫擔任公司主席，忽爾要帶領逾3,000名員工的她，坦言必須放下「老闆」身段，要向員工請教，收收埋埋，反而有反效果。 「你唔講嘅時候呢，冇溝通嘅話呢，其他人咪估你點諗，越估越差嘅，通常唔會越估越好嘅」。如今在同事眼中，她是個有要求的老闆，Annie似乎挺滿意員工眼中的自己，「有一個有要求嘅老闆，同事先會打醒十二分精神，做得更加好」。

與丈夫意見分歧 短訊sticker分解爭拗

現為副行政總裁的丈夫，負責國內市場、工廠管理等，Annie則主力港澳市場，「會唔會完全一樣意見呢？係唔會嘅，始終係兩個人，尤其近年，我更加感受到男同女嘅分別喺邊一度」，她熟練的展示鑽飾說：「好似吊咀戴喺邊個高度先靚，邊個位置好呢？佢哋（男士）係斷估嘅，我就會話返畀佢聽，你係錯架，冇女人會咁戴嘢」，的確，男士普遍對穿戴首飾的技巧沒甚頭緒。

不過，越親的人，越易心直口快，有時討論演變成口角，「靜一靜先囉」。短訊是最好的緩衝工具，「用message、text，可能大家只係樓上樓下，但text可以避免直接衝突；text得好激烈，突然整個笑哈哈，而家咪有啲sticker嘅？整個sticker，突然間好funny咁樣，突然間又解晒喇！」上一秒同事激烈討論，下一秒夫婦結伴回家，「記住大家走埋一齊係因為一份愛」，雙方生意手法不同，但目標一致。

「KOL講一句，好過我哋啲呀爸呀媽講100句」

坊間調查說年輕人比老一輩更捨得花錢，品牌無不虎視年輕人市場，要後生一輩認識謝瑞麟，最快捷的方法是找KOL宣傳。「KOL講一句，好過我哋啲阿爸阿媽講100句」，已為人母的Annie一語中的，莫非子女也成為KOL的「信徒」？恰恰相反，15歲的兒子原來已是打機界KOL，愛拍片於網上分享打機心得，影片更錄得數百萬瀏覽量，打理過億生意的媽媽也笑言「好得人驚」，「佢（兒子）真係只想分享，佢冇諗過自己啲片可以有咁多views（瀏覽量）」。公司近年亦多找KOL宣傳，包括跳出電視新聞框框轉行做KOL的方健儀、前新聞小花陳嘉倩等，這類宣傳手法大勢所趨，「但對公司實質的幫助係measure唔到」。

公司旗下日系首飾系列KUHASHI正好打入年輕人市場，通過近年轉向網上推廣及推出更適合年輕人的產品，客群最低年齡由30歲「後生10年」至約20歲，不過，首飾價位始終不輕，「當然家長要配合，畀一啲支持啦，經濟上嘅支持，先可以support到呢一班近20歲嘅年青人對我哋產品有興趣」。

近年不少首飾設計達人自立門戶，創立飾品網店，某程度上分薄連鎖珠寶店的生意。「其實對成個市場係一件好事嚟，有衝擊就有競爭，有競爭先有進步」，老生常談，卻的確激發了傳統品牌加入新元素，「有時我都會行下PMQ」，在文創地標打探藝術界的脈搏，「多啲留意呢方面嘅動向都可以畀到自己有新思維，亦可以睇到成個零售行業嘅演變」。

記者：邱曉欣
攝影：鄒潔珊

影片－
採訪：邱曉欣、朱得志
編撰：朱得志
攝影：卓振輝、細釗
剪接、後期：何文超
編審：倪敏慧