奧斯卡2023今日就完滿結束，全部獎項亦都已經出爐。大熱電影《奇異女俠玩救宇宙》更加橫掃7個獎項，包括「最佳原創劇本」、 「最佳女主角」、「最佳男配角」、「最佳女配角」、「最佳導演」、「最佳剪接」同「最佳電影」，成為今屆奧斯卡大贏家。除咗得獎名單之外，今屆奧斯卡仲有咩備受香港網民關注呢？即刻一齊睇吓啦！

兩大天后任表演嘉賓 「印度MIRROR」獲大讚

同以往一樣，除咗邊套電影、邊個演員得獎之外，頒獎禮嘅表演嘉賓都係大家好關注嘅地方。今屆嘅「最佳原創歌曲」入圍單位同樣有機會喺奧斯卡台上獻唱，包括Lady gaga獻唱《壯志凌雲：獨行俠》主題曲「Hold My Hand」、Rihanna「Lift Me Up」（《黑豹2：瓦干達萬歲》），當中Gaga素顏牛仔褲受到唔少香港網民關注，而懷孕中嘅Rihanna現身獻唱亦都引嚟唔少讚賞，除咗頒獎禮現場全場起身拍手之外，香港網民亦都大讚Rihanna表現出色。

除咗兩大天后獻唱之外，印度大片《革命雙雄》（RRR）主題曲《Naatu Naatu》今次勇奪「最佳原創歌曲」，而喺表演環節就由14位印度舞蹈員呈現，一眾網民見到都力讚佢哋跳得齊，甚至開玩笑話佢哋係「印度MIRROR」、「印度F4」等等。

頒獎禮節奏慢？主持Jimmy Kimmel被嫌悶

今屆奧斯卡頒獎禮由香港時間8點開始，播到11點半，總共頒發23個獎，歷時足足3個半鐘，有網民就嫌頒獎禮節奏慢，再加上今屆話題度比較高、網民一向比較關注嘅大獎「最佳男配角」、「最佳女配角」、「最佳男主角」、「最佳女主角」同 「最佳電影」喺頒獎禮開頭同結尾頒發，令到部分網民覺得頒獎禮中段冇咩「睇頭」。不過事實上每屆奧斯卡頒獎禮嘅頒獎次序都大同小異，可能網民最想見到嘅就係好似上屆「Will Smith打人事件」呢啲咁Juicy嘅場面。

另外，主持人Jimmy Kimmel嘅表現亦都被網民批評，有網民就覺得佢主持今屆奧斯卡好悶。

ViuTV主持李昭南蔡宛珊成網民關注重點

奧斯卡頒獎禮Jimmy Kimmel今次就被部分網民批評，至於拎到香港轉播權嘅ViuTV就派出李昭南（Mishy）同蔡宛珊（Sarika）擔任節目主持，兩人都身穿黑色禮服全程以英文主持節目，引嚟唔少網民大讚佢哋養眼「2位英文臺一姐唔惹少」、「一朝早就咁Sexy，相當醒神」、「C南好正」同「Sarika好正」等等。

兩位主持雖然索爆，有網民仍然對佢哋嘅表現略有批評，例如有人認為「次次做佢哋兩個都睇到好尷尬 英文一般」、「兩位主持都唔專業 全程都要望住iPad」。不過亦都有網民幫佢哋平反，認為做Live要睇即時賽果都好正常，認為批評嘅網民太吹毛求疵，更加指唔係natives嘅兩位主持英文已經好唔錯。

相關內容

• 奧斯卡2023 ｜楊紫瓊封影后 《奇異女俠玩救宇宙》奪最佳電影七大獎 https://bit.ly/3LezOju

• 奧斯卡｜《奇異女俠玩救宇宙》奪7大獎 楊紫瓊成首名華裔影后：我們正在創造歷史 https://bit.ly/3l77aWK

• 楊潤雄祝賀楊紫瓊獲奧斯卡影后 續提及「香港演員」 稱獲獎彰顯香港演員實力：https://bit.ly/3Li1aoI