【好想追劇】踏入7月 四套讓你陷入戀愛的日韓劇

夏天啦，天時暑熱做咩好？梗係留喺屋企嘆住冷氣追劇最好啦！呢個Summer日韓劇高顏值男女神總動員出動，包保你過一個臉紅心跳，少女心大爆發嘅夏天～

一齊睇下有邊四套日韓劇要即刻放入夏天必睇checklist：

1.《任意依戀》金宇彬+ miss A秀智

金宇彬喺《繼承者們》做霸道又無賴幼稚嘅有錢仔男二，加上model嘅身材，當時已經迷死唔少fans。事隔三年再次回歸電視劇，仲同人氣極高嘅miss A成員秀智拍《任意依戀》，聽落已經好吸引！今次金宇彬會做頂級韓流巨星，秀智就做卑微嘅製作人，佢哋學生時期因誤會而分開，長大後再次相遇嘅純愛故事，7月6日即係今日就開播啦～

2. 《打架吧鬼神》 2pm玉澤演+金所炫

繼《Oh 我的鬼神君》tvN再度推出鬼神題材，果然人鬼戀係有market呀。今次就搵咗2pm玉澤演扮演捉鬼為生嘅驅魔師，「國民妹妹」金所炫就做好奇心重嘅可愛女鬼，一人一鬼住埋喺同一間屋，仲一齊捉鬼，睇嚟會係一套集浪漫愛情、恐怖同搞笑於一身嘅劇集，呢套係玉澤演入伍前最後一套劇，7月11日記得開始追啦。

3. 《有喜歡的人》桐谷美玲+山崎賢人+三浦翔平+野村周平

追開日劇嘅一定會知作為「富士月9」劇，通常都有番咁上下質素（雖然近期收視有點下滑），而且戀愛題材一定走唔甩。今次搵嚟近年做哂各大漫改真人電影男主角的山崎賢人，仲有人氣急升獲封「日本第一美女」嘅桐谷美玲，繼《女主角失格》之後再度攜手合作。劇情講甜點師女主失業去咗初戀間餐廳做嘢，仲住埋佢屋企，仲同初戀嘅二弟、三弟發展出微妙嘅關係。7月11日起，就睇下女主點喺三個花美男中作出選擇啦！

4.《毫不保留的愛》武井咲+瀧澤秀明

日本男神瀧澤秀明繼7年前《雙頭犬》再度拍TBS日劇，同《年齡騷擾》新生代當紅女星武井咲拍少女漫畫改篇嘅《毫不保留的愛》，大玩近年日劇最興嘅不倫戀題材。武井咲飾演本身有男友嘅OL，點知同已婚公司副社長瀧澤秀明發展出一段禁忌戀愛。瀧澤秀明嘅演技相信唔會令人失望，7月12日齊齊睇呢套劇點發展落去啦～

圖片來源：KBS官網、tvN官網、富士電視台官網、TBS官網