如果實體證券部縮皮 散戶去邊聚腳好？

財爺逆市加股票稅，假如嚇跑北水外資，銀行券商或要縮減實體證券部慳皮，咁一班散戶去邊度聚腳好？

經網上或手機理財戶口落盤已經係大趨勢，銀行券商撥出貴重空間作為散戶炒股基地，應該係瞄準年長散戶贏咗錢會樂意轉買理財產品，甚至幫仔女置業查詢按揭之類的「大商機」。但一旦港股交投淡如水，銀行職員或券商經紀再力sell，散戶都未必再有心情買，收益與成本不成正比，銀行券商就大條道理取消實體證券部這個散戶聚腳點。

證券業可學習保險經紀

年長散戶失去聚腳點，應該都不會戒掉炒股，故此有機會決心學用手機App落盤，並改以快餐店、連鎖Café作為炒股聚腳點。夠進取的證券經紀，將來不妨把握此趨勢，學習保險經紀般改以「行街」方式，拎著laptop或平板電腦配合5G手機，跑到散戶熟客仔聚腳點即場幫手落盤，如此貼心服務，順手推介理財產品成功率自然倍增。

共享工作間有商機

財力雄厚年長散戶無地方落腳，連鎖Café亦可能要同中學生爭位坐，此「市場需求」正好為供過於求的共享工作間帶來商機。其實有租用共享工作間常客曾見過有年長伯伯願意月付一千元租用共享工作間，帶齊Laptop同幾份報紙坐足交易時段炒股。在此需求基礎上，無乜生意的共享工作間包裝一下，就可以吸納散戶客。例如特設交易時段優惠，散戶只用交易時段的話，月費可以打六折，並撥出無人用的會議室作為散戶專用「炒股奮鬥房」，年長散戶用得開心，忠誠度往往更勝租幾個月就閃人的自僱客。

至於推廣方式，最好採用傳統途徑，例如在同區銀行券商門口派傳單，又或寄宣傳單張到區內住宅，只要宣傳單張有優惠券兼標榜啡茶任飲，相信有意搵新場聚腳的散戶們都樂於一試吧。

相關報道：

• 鄭松泰指股票印花稅向中產開刀

• 預算案出爐了 誰是大輸家

• 民研：預算案即時評分36.4分 創紀錄新低

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。