學神第8次路試中途被DQ 考官︰基於公眾安全終止你嘅考試

我深信,唔少人連行路都行唔好,行行吓唔理後面咩環境就停低,又或者成班人喺鬧市一字排開,佢地行路都應該要考牌,更何況揸車?   有網友喺CUHK Secrets專頁出post呻,佢第8次考車牌「肥佬」了。之前「死因」分別係打天才波考筆試、超速、冇打燈/睇鏡就cut線,甚至轉彎撞上壆等等。

比起之前嗰啲,今次抵肥好多!首先,斜路起步唔記得畀油就鬆手掣,立即畀考官踩停。然後去到一個燈位,見到黃燈佢竟然唔打算收慢,反而係諗住加速過埋……唔使問,去到燈位當然會轉咗紅燈,佢仲衝埋出去,就實俾考官喺係黃格踩停啦。仲要隔離線有個交通警睇見,好彩冇抄牌,否則佢可能係未有牌就已經收牛肉乾嘅學神。   去到呢度,考過牌嘅你都知,呢位學神都應該再肥一次。   未完架!去到最後,揸揸下有個行人衝出嚟,嚇到阿學神個腦一片空白唔識畀反應,只係識尖叫……咁就梗係再畀考官踩停,仲叫佢揸埋一邊,話「基於公眾安全嘅考慮,我而家終止你嘅駕駛考試,請你落車。我而家會車你返試場」。呢個應該係比起評分紙上個S字更狠嘅評語。   返到試場,場務員、保安同埋其他考生、師傅,見到呢位學神同考牌官調轉坐,個個都手指指恥笑佢。就連個師傅都直頭叫佢不如搵過第二個教,直情話「唔識教」!   而呢位學神最大煩惱係……驚男朋友問起唔知點答!佢仲要覺得俾個天針對,又考慮考唔考多次。   其實考8次車牌筆錢,都夠搭好多程的士/uber,唔好太執著啦施主。   BTW,咪見到手車咁屎就一口咬定係女學神!好多男人手車都唔得,而且……男人都可以有男朋友嘅~原post傳送門【相關搜尋】不滿考牌肥佬內地婦怒擲手機傷考官

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能