學齊十八般武藝就係母愛？ 曾華倩(下)：周身刀，冇張利有乜謂？

從小時候一張白紙，到長大了找到興趣和所長，曾華倩說養到兒子Martin成為喇沙飛魚、港隊代表，也需要摸索也有個過程：「每日早晚練水係一件辛苦事，佢堅持到個前題都係自己真係有興趣熱衷呢樣嘢。我覺得做運動員最重要嘅，唔係鍛鍊身體，而係磨鍊到心智同素質，佢想贏，但係就算呢場輸咗都可以即刻調節自己再準備下一場比賽，呢一種唔怕挫折唔怕輸嘅心態更令我放心。」

樣樣學齊 不如先學好做人
20年前做媽媽，曾華倩說20年前香港地已經有虎爸虎媽，身邊已經有朋友送兒女早晚各讀一間幼稚園，琴棋書畫各國語言樣樣學齊：「我唔敢話佢哋唔啱，每個人湊仔都有自己一套，每個人有權知道自己兒女最適合邊套，但係我唔係咁做。我始終覺得小朋友，冇嘢大得過玩。當然佢哋仲細，爸爸媽媽應該俾佢哋睇多啲、試多啲，直到搵到自己喜愛又擅長嘅嘢再重點培訓，有樣嘢精，一定好過周身刀冇張利。有時睇到新聞，我都覺得好心痛，父母鍾意比較鍾意競爭，將啲壓力轉介喺小朋友身上，樣樣要求佢地好過人，結果搞到啲細路好易諗歪……喺我角度，讀書要盡責，但係更重要都係培養品格。俾我做老闆，我唔會一味揀個學歷高，而係睇佢有冇禮貌、態度好唔好，品格大於一切，我成日同Martin講，人品好我至會喺佢身上睇到前景！」

學水練水 更要學運動員素質
養兵千日和台下十年功，這些道理人人都懂。屢破學界游泳紀錄、成為港隊精英的背後，Martin從小學開始，每天早上五點練水練到七點，放學五至七又再練過，十年如一日風雨不改，長期訓練還要兼顧學業，犠牲了不少玩樂和休息時間，除了獎牌，更重要的是磨練心智：「對一個小朋友嚟講，咁多年咁辛苦練水真係唔容易，正因為佢鍾意、樂於其中，所以佢堅持到依家，唔覺得係辛苦。我諗做一個運動員除咗爭獎牌爭成績以外，唔止訓練技能，最緊要係培養到一個好嘅心理素質。所以我對Martin好放心，知道佢捱得苦又自律，自然就唔容易諗歪行歪路。一場比賽，人人都想贏，但係冠軍只有一個， 作為一個運動員，一定會唔怕輸、唔會因為呢場失敗影響自己下一場成績。佢知道永遠都有下一場比賽，亦都明白失敗代表有進步空間，下次次會做得更好。做人同比賽都係一樣，唔怕挫折更要享受挫折 ，人生太順利，又點會識得珍惜呢？