家族榮耀︳細奶奶陳梅馨 90年代玉女轉型做脫星 同溫兆倫分手被索掟煲費

《家族榮耀》搵返唔少久未露面嘅藝人演出，其中飾演馬家老爺（于洋飾）二太太、馬昭慈（梁靖琪飾）媽媽嘅陳梅韾（曾改藝名陳明君）更加有25年未拍過劇！放諸今日，陳梅韾應該係好快被宅男起底嘅女神BB，雖然唔係主角，但外型甜美而有唔錯發展。不過當年同溫兆倫分手搞出大頭佛，後來更放手一搏拍三級片，並未為事業帶來起色。

53歲嘅陳梅馨喺馬來西亞成長，19歲參加港姐，但係嗰屆佳麗被稱為歷年來數一數二高質，冠軍更加係李嘉欣，陳梅馨最終都係落選。後來佢加入TVB做藝員，好快就唔駛做茄喱啡，喺《壹號皇庭》系列演檢控官，後來亦拍過多部劇集。

但係令陳梅馨更多人認識嘅可能係佢同溫兆倫嘅感情，佢地拍拖一年幾，喺1996年分手之後，溫兆倫向舊愛追討14萬分手費，更加入稟要求法庭唔俾陳梅馨出國讀書。溫兆倫後來解釋係因為當時父親患病要籌錢，佢只好追討「掟煲費」。呢單新聞令陳梅馨同溫兆倫雙方星途做成負面影響。

陳梅馨幾乎絕跡娛圈之際，1999年又傳佢介入姜皓文同女友金慧英嘅關係，陳梅馨表示知道做咗第三者後果斷分手，並離開娛圈。但係事隔一年就轉戰電影圈，更加為演出露點示人，亦為有線電視主持性話題節目，不過未能挽回事業，到2005年陳梅馨正式淡出幕前，改行開餐廳。

早幾年陳梅馨曾經現身《流行經典50年》，當時佢表示單身，又澄清同溫兆倫從未結婚，亦唔想再提當年事，以免影響對方。陳梅馨受訪時感嘆當時唔識處理感情事，應該成熟一啲。2016年有傳媒影到陳梅馨同同性密友拖手行街兼同居生活，但係陳並冇回應。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！