容祖兒疑被「鹹豬手」摸大腿？相中人原來係好朋友兼攝影師Leslie Kee

近排法國巴黎舉行時裝周，容祖兒都有份獲邀到當地睇時裝show，佢仲趁空檔時間去一轉倫敦，同老友黃偉文見面。而喺時裝周期間，內地社交平台瘋傳一段影片，祖兒睇show期間，有名男子打招呼並要求合照，但係呢位男士將手放喺祖兒大腿，走之前仲拍多一下。

唔少歌迷翻睇片段，認為男子舉動唔太適合，表現得相當心痛。網友從片段所見，認為祖兒一直捉住對方隻手，但又冇開口揭發，處理得非常高明。

但係另一方面，亦有人認為該名男子唔見得有故意「抽水」嘅動作，無需要太緊張。有留言網民更指出，相中男子係一位新加坡攝影師，同祖兒本身認識，所以只係朋友親切舉動。

睇返祖兒IG share喺巴黎影嘅相，見到呢位被指「抽水」男子嘅合照，立即真相大白！原來呢位男士係國際著名攝影師Leslie Kee(紀嘉良）！Leslie Kee同過唔少香港藝人合作，祖兒2019年嘅Pretty Crazy演唱會海報造型照，正正由Leslie主理一手包辦造型、設計同攝影。當年為咗呢輯相，祖兒直情係飛去東京24小時搵Leslie掌鏡，兩人有默契有交情，難怪見面咁肉緊。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！