雅虎香港新聞 【審訊特寫】庭上憶傘運仍觸動 黃浩銘今天想問⋯⋯
黃浩銘每日都以招牌露齒笑容視人，官司纏身的他，正面臨第三度入獄的可能。在佔中九子案裁決的那天（4月9日），黃浩銘被判煽惑他人犯公眾妨擾罪、煽惑他人煽惑公眾妨擾罪，兩罪罪成。他聞判時只微微一笑，沒有再多的表情，平靜地等待判刑。
他與關注囚權的組織製作了一本《白手指南》（白手：首次入獄的人），內容由他撰寫。黃浩銘說：「我自己嘅角色就係入獄爛頭卒，咁所以我有好多呢啲叫經驗之談，可以同佢哋（九子及其家人）分享，可以鼓勵吓佢哋，等佢哋可以預見到模模糊糊嘅未來，然後令佢哋嘅心情平靜啲。」
黃浩銘與未婚妻的婚事已經拖了兩年，期望這次案件過後可以完婚。未婚妻一再面對他的入獄，也變得堅強。黃浩銘與未婚妻曾邀請三子偕妻為其婚宴試菜，飯局亦為三子太太而設，分享面對另一半入獄的經驗。
黃浩銘於審訊期間在個人Facebook貼出一張三文治照片，寫道：「我是個幸福的年青人！多謝 Benny YT Tai 太太弄的早餐，佢話20日聆訊，有20份不同的早餐。😍」他憶述審訊日子，仍為此感動，「我哋審訊嘅lunch time，係好開心嘅，我哋大家被告一齊食飯。陳健民太太同戴耀廷太太，佢哋都自製咗一啲食物同我哋分享。呢啲都係好感動。我無試過一啲審訊係咁樣，所以呢啲真係叫love and peace。」
審訊第2日（11月20日），鍾耀華遲到幾分鐘。這等候的期間，民主黨何俊仁走到被告欄跟其餘8人打招呼，黃浩銘著他坐在鍾耀華的位置上，庭上眾人聞言失笑，何俊仁當然沒有坐下。
審訊第3日（11月21日），控方續播放呈堂的警員錄影片段。片中，黃浩銘拿著大聲公形容：「梁振英個七頭」，法庭內的他聽見自己曾說過這話也顯得有點驚喜。片裡的黃浩銘又向群眾說：「你哋唔係受我煽動，你哋係自發出嚟，係咪？」群眾則回應：「係！」庭內公眾席傳出笑聲。
審訊第4日（11月 22日），庭上播放三子於2014年12月2日記者會上的片段，戴耀廷看著看著突然伏起來哭了。黃浩銘形容這是他回憶中較深刻的片段，當時他與戴耀廷之間相隔了6個人，「犯人欄嗰度有個電視機仔，我一直都留意住個mon，聽住佢哋三個講，老實講，（片中）Benny、陳健民講嘅都係一般嗰啲嘢，大家都知，朱牧師講到一啲年青人，牧師比較感性，講到好想年青人平安返去嘅時候，突然間我聽到一聲嘅、大聲嘅偷泣，然後我就擰個頭過去，見到Benny伏低喺度喊。」
「我一直以嚟同戴耀廷嘅相處，知道佢係一個好好先生。呢一場咁大嘅運動，其實我知道佢係好大壓力。無論係開始去到終結、去到今日，佢都係好大壓力，雖然你見到佢好似好樂觀，搞呢搞路咁樣。咁當然我覺得牧師講嘅係有佢嘅感動，但係我更加觸動到嘅就係，唉，咁耐以嚟真係辛苦Benny。」
審訊第9日（11月30日），辯方播放由梁思眾執導的紀錄片《傘上：遍地開花》逾一小時片段。黃浩銘記得：「我哋睇嘅大電影啦，全球首映，全球首次喺法庭公映。呢個都好深刻嘅，譬如有啲滑稽嘢，大家喺度笑，但笑完之後又喊。」這天的另一亮點，在於他的皮鞋。在審訊的日子裡，他大多數穿木履（他一再澄清那不是人字拖），唯有社民連會慶兼籌款晚會當天，他穿上皮鞋。晚會現場亦都有多位同案被告支持，包括陳淑莊、張秀賢等。
審訊第10日（12月3日），黃浩銘爸爸穿著綠色襯衫首度到庭，黃浩銘說：「英文審訊佢又唔識聽，佢嚟咩啫，不過佢想嚟撐吓我，以前係我坐監之後佢先探我。」黃父不知道可以坐親友席，便坐到了公眾席，在被告欄內的黃浩銘偶爾與爸爸對望示意。中午時，黃父被「長毛」梁國雄帶走食飯。
黃浩銘說：「我諗（爸爸）接受程度（指可能第三度入獄）已經比以前大了，雖然老實講，無人想個仔坐監，但我諗會比之前好咗啲，但有一定程度嘅不捨都係正常。」
回想18天的審訊，黃浩銘說：「我只能夠講嘅就係，當刻（紀錄片裡）嘅香港人好觸動我，譬如去到一啲位，我都忍唔住，我都要喊，就係我覺得香港人好團結、互相遞水、執垃圾、互相聲援，即係呢啲畫面，我有一段時間無睇到，或者可能我哋大家都忘記咗，但我覺得呢啲係好珍貴。即係人同人之間嗰個信任，中間無牆隔住我哋，唔係咩民主派、本土派、乜派物派，而係我哋就係香港人。」
「香港人又唔會話排斥咩新移民呀，我哋大家都係爭取民主嘅人。我哋呢一刻就係要真普選，我哋見到有催淚彈，我哋共同去抵抗，我哋互相遞水，即係呢啲畫面係最令人觸動。所以如果話懷緬，我懷緬呢啲嘅過去。咁但係當然我唔會停留喺過去。調番轉就問，我哋點樣創造一個更美好嘅⋯⋯真係好老土，即係更好嘅傘運、更精彩嘅群眾運動。」
觀看原文： 按此連結
