寶寶大過天｜龔慈恩嚴厲有氣勢 重溫近年無綫劇集虎媽

無綫劇集《寶寶大過天》以育兒為題材，講述新手父母嘅辛酸點滴和兩代人嘅溝通問題，劇集題材​貼地，共鳴感十足。劇集除咗有馬國明及岑麗香主演之外，仲搵嚟80年代兩大花旦龔慈恩和商天娥大鬥演技，分別飾演「Mean爆」外婆同「幫倒忙」嫲嫲，為孫女及仔女擦出唔少火花。龔慈恩飾演嘅婆婆Diana，係一位退休名校小學校長，所以佢非常緊張孫女童童（梁芯語飾）嘅教育，好想佢可以入讀名牌幼稚園。另外，亦為咗培養童童成材，連阿女悠悠（岑麗香飾）同女婿游在山（馬國明飾）嘅一舉一動都要理埋，仲試過逼在山接受特訓，最新仲講到佢私自聘請外傭姐姐Siti（朱斐斐飾）。其實除咗Diana採用「虎式教育」之外，近年無綫劇集都有唔少虎媽，不如而家就同大家重溫一下啦！

《親親我好媽》江美儀
江美儀喺劇中飾演查向善，一直以「軍訓式」教育兩個女、肉緊專橫及為佢哋安排晒一切，例如為阿女報讀名校不惜租劏房、測驗考試差少少先拎到100分都要鬧、阿女為咗滿足佢而放棄志願選擇讀理科等等。

《親親我好媽》米雪
米雪喺劇中飾演查向善（江美儀飾）嘅媽媽于佳妍，係一間著名芭蕾舞學校校長，佢作為虎媽嘅虎媽，當然自細對向善嚴格管教，希望佢可以成為上等人。雖然向善選擇下嫁平凡嘅嚴夏（黃智賢飾），不過就繼承咗于佳妍嘅「虎媽」特質。

《老表，畢業喇！》蔡少芬
蔡少芬喺劇中飾演張進強，係一個典型強勢虎媽，一直望子成龍，將所有期望放喺阿仔身上嘅佢，經常催促及過度關心阿仔，導致母子關係惡劣。另外，佢為咗操控其他家長，而去做家長教師會主席。

《金宵大廈》高海寧
高海寧喺劇中飾演周小惠，有一個8歲嘅仔仔東東（鄭耀軒飾），為咗東東可以有好成績，不惜安排海量功課班同課外活動，搞到東東覺得好辛苦，最終更選擇唔想做大人，留喺鴉烏婆嘅世界。

《一屋老友記》滕麗名
滕麗名喺劇中飾演寶欣，為了迎合遺囑條款，帶埋囡囡Bianca搬回老家與其他兄弟姊妹同住。佢對囡囡寄予厚望，所以管教非常嚴厲，為咗囡囡可以入讀名校，佢安排各式各樣嘅補習班及課外活動俾Bianca，不過卻因管教女兒方式與老公出現分歧，經常發生爭吵。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！