尋秦記電影版｜原班人馬演出 神還原當年「vowking」T恤 網民感回憶返晒嚟

2001年TVB電視劇集《尋秦記》由古天樂、林峯、宣萱、雪兒、郭羨妮等演員演出，劇集大受歡迎，亦成功令林峯及雪兒變得入屋；劇集於2005年及2015年分別喺凌晨時段重播，每次播出都勾起唔少網民嘅集體回憶。古天樂早年買下版權並親自召集原班人馬演出，共投資3.5億拍攝電影版。《尋秦記》電影版於2019年拍攝完畢，電影公司天下一曾於2021年3月發布《尋秦記Back to the Past》首條宣傳片，不過一直未確實上映日期，當時有傳電影於同年11月香港上映，但電影公司天下一否認檔期；而近日，有消息指出《尋秦記》電影版將有機會於2024年上映。

《尋秦記》電影版拍攝過程及演員造型相當保密，當年古天樂僅透露故事會發生喺19年後，由於有穿越劇情，所以會融合科幻元素，同時電影版與電視版相同嘅係項少龍有個兒子。《尋秦記》電影版宣傳片於2021年3月由天下一電影釋出，片長44秒，官方亦列出劇情簡介，電影講述一場多年前嘅冤獄，引發改變歷史嘅危機，Ken誓要回到古代成皇，以彌補因冤獄而失去嘅人生；身在秦朝嘅項少龍一家雖歸隱園，但一舉一動仍被徒弟秦王嬴政盡收眼底。正當嬴政一統六國，以為平定天下之時時竟碰到Ken嘅突襲，於是佢不得不去尋找又敬又畏嘅師傅，呢對師徒久別二十年再次碰面，加上穿梭時空誓要改變歷史嘅Ken，三人令秦朝再起風波，改寫命運。

從預告中看到，項少龍（古天樂飾）與嬴政（林峯飾）揸槍及拔劍角力，項少龍對住嬴政講：「你可唔可以放過我一家人？」；嬴政決絕回答：「如今是你家鄉的人不放過寡人﹗你仲當寡人係徒弟咩？」 ，又揚言所有恩怨從此了斷，情節張力十足。預告又有影到一班電視版演員都有份參與，包括飾演烏廷芳嘅宣萱、飾演美人琴清嘅郭羨妮、滕麗名、以及已於電視版死去嘅雪兒，不過就未知雪兒嘅角色係屬於新角色定係原有角色「翻生」；另外，網民亦對於電視版飾演首富李小超嘅鄧一君、飾演烏博士嘅廖啟智及飾演陶總管嘅歐瑞偉有份演出感到驚喜。據悉，演員們每日拍攝前都要花上接近3小時梳化，亦由於故事講述19年後，頭髮造型都會出現白髮。同時，電影版神還原項少龍當年嘅代白色公仔「vowking」T恤，據悉係由服裝部手繪而成。

唔少網民都覺得《尋秦記》電影版要有埋喺電視版飾演「連晉、嫪毐」嘅江華先夠完美，江華當年就表示，以演員角度睇，20年前同20年後今日仲要拍同一個角色，唔知想表達啲咩，但從商業角度睇，大家都咁鍾意，係會有追看性。有網民就同意原班人馬演出點演繹當年神態，又批評女角都已經老晒：「全部老餅的世界，此終20多年前的記憶，往事只能回味」、「女主角好老，覺得好趕客」、「睇咗劇照，郭羨妮、宣萱勁老，似大媽版《尋秦記》」、「唔睇好，衰係女主角果度又老又唔紅，除非戲份全集中古仔林峯」、「真係一個後生女新人都唔用? 搵鬼睇牙」、「郭羨妮，差點沒認出來」等等。不過都仍有好多網民表示一響起音樂回憶已返晒嚟，相當期待電影版上映，又有網民希望TVB安排於深宵時段重播《尋秦記》，有助溫故知新。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！