《尋秦記》電影版 落實劇集三大主角擔演

早前《尋秦記》宣佈開拍電影版，近日海報曝光並宣布由劇集嘅原班人馬古天樂、林峯及宣萱主演。導演由曾奪得多屆香港電影金像獎、台灣金馬獎及亞洲電影大獎最佳視覺特效嘅吳炫輝，以及新晉導演黎震龍擔任。

消息一出我就開始期待。無他的，係我青春年代其中一套大熱劇集嘛，想當年TVB嘅劇集係平淡學生生活嘅主要娛樂！

《尋秦記》喺2001年首播，雖然2015年喺電視重播過，但相信很多青春無敵卜卜脆嘅觀眾應該未睇過，今日借個位介紹介紹！

《尋秦記》由作家黃易同名小說改編，可以話係穿越劇嘅始祖！主角項少龍（古天樂飾演）因為科學實驗意外，由現代被送返戰國時代，跌入歷史嘅軌跡，扶植咗趙盤（林峯飾演）、即係後來嘅秦始皇一統天下。《尋秦記》係古天樂喺TVB最後一套劇，之後嘅佢全力主戰大銀幕，今次開拍電影版甚具意義！

怕大家補錯習煲錯劇，首先搞清楚，令人興奮係因為電影根據2001年TVB廣東話電視劇改編，而不是今年內地出街嘅網劇版。原著與港劇版主角項少龍都係警察，而不是內地網劇版嘅太空人（由陳翔飾演）。內地新版網劇入面嘅項少龍有好多高科技武器，隨身投射、激光槍嗰類有齊晒，最勁係古代人接受度咁高，見到佢啲裝備都無嚇親！

十幾年人事幾翻新，但個個都keep得好好喎！

2001年嘅林峯仲未get wet，依然係新人一個，1998年加入TVB由無名字嘅路人做起，2001年第一次喺《美味情緣》擔演比較重要嘅角色，做楊千嬅男朋友。第二套孭重戲嘅就係《尋秦記》嘅趙盤，開始佢小生之路！

你認識嘅宣萱可能係近期嘅mall姐，或者無線御用人質。其實90年代2000年頭嘅宣萱係無線當家花旦之一，拍咗好多好多劇：《壹號皇庭》、《天地男兒》、《天地豪情》、《刑事偵緝檔案》、《戇夫成龍》等等等等！《尋秦記》佢飾演烏廷芳，最後嫁左俾項少龍。

至於古生飾演項少龍，有腦有外貌，所以劇入面好多女冧佢。呢次電影版，佢唔只係主角，仲有多個角色……就係老闆！因為套戲係由佢公司「天下一」開拍。

睇返大家嘅before and after，原班人馬拍應該可以無縫接軌，大家個樣無變過咁滯！