小六生「O嘴」訪問片爆紅 小薯茄極速拍片神還原 網民反應兩極

2024年升中派位喺噚日（9日）放榜，大批小六學生同家長到學校等候派位結果嘅同時，唔少傳媒亦到油蔴地天主教小學（海泓道）進行採訪，當中有一條係關於幾位成績優異嘅小六學生接受記者提問，因佢哋嘅反應及表情而爆紅。YouTube頻道「小薯茄」即晚就抽水拍攝，模擬一個「最佳員工」接受訪問，成功「神還原」訪問。

話說噚日有一名自問只係Band 2質素嘅陳學生，佢成功考入第一志願－華仁書院，佢對派位結果感到喜出望外。喺接受傳媒訪問時，佢就分享自己嘅學習心得，佢喺就讀五年級開始就每星期去補習5日，仲要一放學就即刻去補習，同時為咗提升自己，佢都參加唔同嘅課外活動。而企喺佢身後嘅兩位同學就即時作出反應，右邊嘅同學疑似喺度忍笑，而左邊嗰位同學就聽到「O晒嘴」。之後，陳學生認為自己嘅努力得到回報，而過程亦唔覺得辛苦，佢仲表示「我覺得讀書係我嘅本份」，身後兩位同學再次偷笑及露出驚訝表情。

由於該影片喺網絡爆紅，YouTube頻道「小薯茄」即晚迅速抽水，拍攝咗一條模擬「最佳員工」嘅訪問，企喺中間嘅程人富分享感受，而企喺佢身後嘅朱Mic及肥蚊就完美複製偷笑及「O晒嘴」表情。

影片出街後，唔少網民大讚佢哋有效率及好好笑，留言話「抽水快過Ikea小編」、「叫你模仿，冇叫你超越」、「咁快手得唔得」、「朱mic 表情好正」、「三個都完美演繹」、「三個都表現出色」、「抽到乾哂」、「抽水咁快嘅」、「肥蚊d 微表情好好笑」、「富哥真係演繹得好神似！！」、「靚抽兼快抽」、「效率永遠是關鍵！堅抽！」、「好似，真係好似」、「富哥好正 無限loop無限笑」、「勁！抽水超快！」及「程人富真係好快手，抽水抽得好～好好笑呀！」等等；不過亦有網民唔認同佢哋抽水，因為會影響訪問中嘅小朋友，留言表示「唔好攞呢d野嚟抽水好嗎？好影響果幾位小朋友」、「對你地有點反感」、「小朋友水都抽，唔好啦」、「點解要笑學生」、「全抄毫無創意」、「俾人咁樣抽水法，個小朋友好有陰影。拍呢d 抽水片，唔怕爆公關災難咩？」及「網絡欺凌咪喱（呢）啲囉！！你當搞笑，有無諗人/小朋友點諗？！！！！！笑完咪算，仲要邊C」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！