尖沙咀最新露營主題日式燒肉店!3700呎室內Glamping體驗

想露營唔使等放假!尖沙咀呢間新開嘅日式燒肉店以露營為主題,有齊帳篷、露營櫈、露營燈,連食嘢嘅餐具都係露營用品,感覺好Chill又有玩味。餐廳室內佔地約3,700平方呎,有足夠空間畀大家吹住冷氣圍爐燒肉嘆啤酒,無論係三五知己定一家大細都好啱嚟食嘢傾計放鬆下。

裝修呼應露營概念,到處可見大自然同露營元素
裝修呼應露營概念,到處可見大自然同露營元素

火土燒肉係ATUM旗下最新餐廳,位於尖沙咀一間商場嘅轉角處,去到一見到門口嘅帳篷立刻有露營Feel!取名火土源自「灶」、即爐灶,與餐廳英文名Hearth同義。而且五行中有「火生土」嘅概念,借用呢個生生不息嘅意味,希望做到促進人與人之間互相交流。

輕鬆露營主題 最啱一班人聚餐

從碗筷到調味料碟都係露營用具,更有儀式感
從碗筷到調味料碟都係露營用具,更有儀式感

餐廳室內約3,700平方呎,搵嚟日本室內設計師主理,唔單止牆上掛滿露營用具,每張枱都會有露營燈同餐具。有圓爐亦有卡位,無論係一大班朋友,定三至四人小家庭都可以坐得舒服。而室外約2,000平方呎空間預計將於10月啟用,喺戶外飲啤酒更Relax!

日式燒肉 食齊牛/豚/雞配自家醬汁

全牛特選拼盤($458)
全牛特選拼盤($458)

餐廳選用嚟自日本、澳洲同美國三地嘅牛肉,懶得諗當然就係嗌拼盤啦。全牛特選拼盤一份試齊牛肋肉、牛三筋、牛胸腹、雪花牛小排、薄切香蔥牛舌,四款肉都用自家調配嘅燒汁輕醃,依然可以食到牛肉本身嘅肉香。牛舌口感爽脆,配香蔥增添辛香。

牛里脊肉($98)
牛里脊肉($98)

牛里脊肉雖然望落油花唔算特別多,但因為係牛運動量極少嘅部位,所以肉質非常細緻軟嫩,而且肉汁豐富。單點肉類可以自選醬汁,月見松露醬汁係生蛋黃加上黑松露,令牛里脊肉入口更柔滑,同時帶淡淡松露獨特幽香。

兩款自家醬汁可以隨意搭配
兩款自家醬汁可以隨意搭配

枱上亦有放置鹽同兩款自家醬汁畀大家按喜好添加,燒汁帶鹹鮮味非常百搭,另一款紅酒汁偏酸少少可以一解油膩感。

大推韓國豚腩肉

豚腩肉($168)
豚腩肉($168)

豚肉同雞肉則分別採用韓國濟州豬同阿波酢橘雞,開飯仔私心推介豚腩肉,厚切腩肉分量十足。兩面燒熟再剪開,可以保留最多肉汁,食落充滿豬油嘅甘香,瘦肉部分亦非常鬆化!可以選擇柚子胡椒或生薑味噌醬汁,更進一步減低膩感。

味噌蟹肉甲羅燒($88)
味噌蟹肉甲羅燒($88)

亦有海蝦、鰻魚、廣島蠔等海鮮,而呢份味噌蟹肉甲羅燒就勝在燒嘅時候已經可以聞到陣陣蟹肉同味噌嘅香氣,撈埋蛋黃一齊食落鮮味濃郁。


餐廳特別從日本訂製燒烤爐,從爐邊360°抽風,食完燒肉都唔怕身上會有異味
餐廳特別從日本訂製燒烤爐,從爐邊360°抽風,食完燒肉都唔怕身上會有異味

打卡必點海鮮Cocktail杯

熱帶風情海鮮雞尾酒杯($128)
熱帶風情海鮮雞尾酒杯($128)

用鮮果配搭帶子、吞拿魚、蝦同柚子啫喱,用高腳雞尾酒杯奉上,再加上食用花點綴,有度假Feel得嚟又啱打卡!水果嘅甜味同柚子啫喱嘅清香帶出海鮮嘅鮮味,口感層次豐富。

柚子檸檬冷麵($58)
柚子檸檬冷麵($58)

粉紅色嘅梅子紫蘇素麵製作成冷麵,就咁食已經有紫蘇香同淡淡嘅梅子酸味。再配搭柚子皮同檸檬,柑橘香氣令冷麵更清新怡人,可以一清食燒肉嘅油膩。

(前)味醂魚乾($28)
(前)味醂魚乾($28)

小食方面可以試下味醂魚乾,魚乾本身偏硬,強烈建議大家燒香再食,唔單止會變得更好嚼,味醂嘅甜味亦更突出,點埋蛋黃醬,送酒一流!

抹茶蕨餅($48)
抹茶蕨餅($48)

最後點少得甜品先,抹茶蕨餅裹上一層抹茶粉,茶香清幽,蕨餅口感滑溜軟嫩。

露營必需酒!手工啤酒精選

餐廳供應手工啤酒,不定期更換款式
餐廳供應手工啤酒,不定期更換款式
(左)Carbon Brews Sour Punch($48)、(右)Asahi啤酒($58)
(左)Carbon Brews Sour Punch($48)、(右)Asahi啤酒($58)

露營同燒肉都唔少得嘅就係啤酒,呢度On Tap有Asahi啤酒同健力士黑啤,Asahi啤酒勝在泡沫綿密、味道清爽順口。餐廳亦引入手工啤酒,不定期更換酒廠,開張呢期就係本地酒廠Carbon Brews嘅出品,Sour Punch加入熱情果、菠蘿、芒果、紅桑子等釀製而成,入口充滿熱帶水果嘅酸甜,開胃解膩。

海鹽菠蘿梳打($38)
海鹽菠蘿梳打($38)

唔飲酒嘅話亦有多款梳打選擇,菠蘿梳打以菠蘿甜味為主,杯邊嘅海鹽粒就可以平衡甜膩感。

火土燒肉

地址:尖沙咀河內道18號K11 Art Mall3樓314號舖

文:Cathy.H

相:Michael

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能