屯門娜娜「夜繽紛」夜市旁唱跳炒熱氣氛 Happy伯伴舞逾百名Fans撐場

香港夜繽紛啟動，由尖沙咀星光大道與K11 MUSEA合辦嘅海濱夜市亦已開幕，20蚊4粒燒賣引起話題；除此之外有網民就發現「屯門娜娜」董幸兒日前於夜市附近又唱又跳，吸引到逾百名Fans欣賞其表演，頭號粉絲Happy伯亦有撐場。

娜娜當日身穿黑色Bra Top搭配白色超迷你裙，以及一件長度於胸上嘅超短身上衣，露出小蠻腰，打扮相當性感。娜娜一邊唱歌一邊隨住音樂節拍扭動身體炒熱現場氣氛，一班現場觀眾伯伯都非常投入，包括拍手及舉起手機拍攝，而Happy伯就為娜娜伴舞支持。

其實Happy伯一向都好支持娜娜，去年娜娜參加TVB音樂選秀節目《中年好聲音》，由100強爭奪50強席位錄影時，Happy伯與一班街坊們都有份去支持，Happy伯更專登戴上粉紅色帽襯返娜娜個粉紅色頭髮。今年4月，日本偶像組合「Johnny's WEST」成員藤井流星來港拍攝，到訪廟街期間遇到娜娜，二人合唱鄧麗君《我只在乎你》，藤井流星仲即時google日文版歌詞，Happy伯相當興奮，係咁叫藤井流星快啲唱及企喺二人中間跳舞，又塞咗張100蚊俾佢。唱完《我只在乎你》之後，藤井流星繼續與娜娜合唱，Happy伯除咗加碼拎出一疊100蚊，亦親身教藤井流星跳舞，但其中一個疑似「推車」動作，藤井流星唔知係咪因為感到尷尬就無跟從。不過唱完歌之後，Happy伯都有為藤井流星大力鼓掌。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！