廉政狙擊｜傅嘉莉性感造型盡騷豐滿上圍 主動加被摸pat戲搏到盡

TVB劇集《廉政狙擊》正熱播中，傅嘉莉（Kelly）於上周四（2/3）登場，劇中飾演尹在詩，主力協助商業巨鱷卓廷光（黃智賢飾）及傅天耀（郭政鴻飾）透過買賣藝術品洗黑錢，又係卓廷光兒子卓日升（高鈞賢飾）秘密情人。

傅嘉莉嘅角色定型為美麗而又帶點邪門嘅事業型女性，故劇組於造型上費盡心思，就以傅嘉莉首登場嗰集為例，短短一集就以性感造型搶盡風頭，包括貼身剪裁、低胸、露肩及露背設計，一出場嘅中空貼身長裙盡騷豐滿上圍；傅嘉莉表示幾乎每場戲都有一套新衫，而一出場嘅戰衣係最喜歡但又係最蝦人著嘅一套，當日服裝部同事幫佢著咗成個鐘：「我哋黐咗好多膠紙，因為我演戲時唔係好希望畀其他嘢斷斷續續咁影響到，好容易會出戲。」

傅嘉莉被激讚劇中造型有女人味，今次嘅角色亦有好好嘅發揮，其中一場「鈕扣對峙」黃智賢場口成為焦點，講述喺黃智賢威迫下，傅嘉莉被迫將恤衫鈕扣除完又扣、扣完又除，一臉委屈仲流下眼淚。傅嘉莉表示，落淚係臨場反應，亦全靠黃智賢幫佢入戲：「Ben好畀到嗰種壓力我，我冇諗過我會喊，每次演同排戲時我都冇喊。」傅嘉莉每次拍劇為做好角色，可以奉獻身體畀個角色，例如剪頭髮、曬黑、變瘦都曾經試過。傅嘉莉透露好似呢次著性感衫嗰陣唔會覺得嗰個係自己：「我唔會帶好多傅嘉莉嘅準則去尹在詩個角色度，唔介意之餘有時甚至係我自己要求不如去盡啲。」 除咗唔介意性感演出，傅嘉莉更為劇情需要主動加咗兩場被黃智賢及郭政鴻摸pat戲份：「因為呢兩場戲都係女導演，所以我好安心，其實劇本係冇摸Pat Pat，但我同導演傾過覺得符合劇情，所以就加咗。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！