廖啟智逝世︳大學教戲劇培育人才 為學生首次做導演拍港台劇

入行超過40年嘅廖啟智，2010年起加入浸會大學出任全職講師，主力教導戲劇表演，成為課程吸引年青人嘅生招牌。雖然智叔幕前經驗豐富，但因為未試過教學工作，要經一番掙扎先答應。而教育下一代嘅過程亦令智叔重燃對演出嘅熱情。

智叔曾經接受浸大的刊物訪問，提到出來工作37年，因為教書先至正式有一張辦公桌，而且每星期有固定幾日要上堂，亦係新鮮體驗。中學畢業就投身社會嘅智叔，事前睇好多書做好備課，而且唔係落堂就收工走人，每個月都會同學生食飯交流。

智叔明白學生演戲要有實戰經驗，2013年答應幫港台劇集《一念之間2》首次做導演，等同學有機會參與演出。向來為人謹慎嘅智叔直言如果唔係從學生得益著想，係唔會接呢個job。而為咗令同學明白行頭競爭，智叔仲公開招募演員，等其他院校嘅同學一齊角逐。

教書對智叔有好大嘅得著，認為可以睇返以前自己對演戲嗰團火，甚至話「係啲後生俾機會我」。而智叔本來應承為浸大畢業生嘅電影作品演出，但因為發現患癌而辭演，外間當時先知原來智叔身體有事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！