《廿幾歲嘅男人 必定想試下姊弟戀》

我係九十後，近年發現身邊好多朋友都係處於姊弟戀，我自己都係。我有好多男性朋友二十歲時候都係同緊啲細過自己，十八歲嘅妹妹拍拖。但去到近年大家都廿五六歲，佢哋長大咗反而更加渴望同大過自己嘅女仔拍拖。原因都離不開佢哋開始厭倦咗單純被崇拜，湊女式戀愛，長大咗就開始想同一個思想成熟，可以幫助到自己成長嘅另一半拍拖。我知呢個情況可能只會出現係廿幾歲嘅男仔，到男仔三十幾歲又可能會想搵番個年輕嘅女朋友。而我今日想討論嘅都係二十幾歲時期嘅姊弟戀。

我都係當事人，雖然一直都話女仔本來已經比男仔成熟，但我可以話你知只要你同一個思想成熟嘅弟弟一齊，其實你唔會覺得自己係湊仔，或者嫌棄對方嘅不成熟，所以只要你搵啱思想同你同步嘅弟弟，姊弟戀係唔會有湊仔嘅感覺。

不過我會話你知姊弟戀要面對嘅係一個永遠嘅時差問題。

同思想外表性格無關，而係好現實嘅年齡問題。一個女仔去到廿幾歲就會開始諗到結婚，而一個廿歲出頭嘅男人事業都未穩定又點會諗結婚？女仔三十五歲後就高齡產婦，於是女仔會想到幾年後就要生仔，但係一個廿歲出頭嘅男仔又邊有能力去做爸爸？

然後好多人會話結婚可以唔使錢㗎！現實啲啦，你生活喺咩都講錢嘅香港你話結婚唔使錢？你淨係去簽咗紙飯都唔請屋企人食都要幾舊水啦。下一個問題就係住屋問題，喺香港廿幾歲想買樓？除非你老豆有。然後又有人會話同屋企人住囉，但真係有幾多個係真心同你屋企人相處到而又無婆媳糾紛？喺香港，貧賤夫妻真係百事哀㗎！

姊弟戀最大難題就係你同其他人嘅戀愛步伐會唔一樣，因為你身邊嘅朋友可能搵咗個大十年，建立好事業嘅男人準備結婚。而你就要做好心理準備，唔係捱窮，而係你比其他人需要更多時間，去等個男仔建立事業。努力啲呀，處於姊弟戀嘅男人們！