張兆輝向海嵐大曬《無頭東宮》21年後重聚合照 陳妙瑛離巢後成商界女強人

TVB古裝劇《無頭東宮》係許多人嘅回憶，雖然當年特效未如現時成熟，但題材新穎惹起極大迴響。日前，張兆輝和向海嵐分別於社交平台分享《無頭東宮》演員相隔21年重聚嘅照片，張兆輝寫道：「難得20年後那麼齊人 、東宮凌雲 、西宮楚楚，二個皇兒，能勾起大家的童年回憶嗎？」。向海嵐PO相時亦表示：「這是一個熟悉的組合，記得嗎？」在場嘅人包括張兆輝、向海嵐、陳妙瑛、敖嘉年、杜大偉，以及劇集監製張乾文。帖文一出，即時掀起網民回憶；21年過去，《無頭東宮》演員亦各有發展，一齊睇吓佢哋有咩變化！

向海嵐（飾演角色：凌雲、楚楚）
48歲向海嵐當年於《無頭東宮》一人一人分飾兩角，佔據劇中大量反派戲份，當年更被讚演奸妃入型入格。向海嵐1998年勇奪香港小姐冠軍、最上鏡小姐、環球美態大獎、動感都會大使，以四料冠軍姿態入行，2008年毅然退出娛樂圈到上海做公關，2015年復出參演電影及電視劇拍攝，2018與朋友合共投資7位數字於中環開設翡翠珠寶店；更於2021年擔任香港小姐導師，為該屆港姐特訓及分享心得。向海嵐當時就分享，參選香港小姐就好似昨日嘅事，保養方法最重要係心態，譬如自己心態係保持「覺得自己20幾歲」，咁個人就會後生好多。

陳妙瑛（飾演角色：楚楚、凌雲）
50歲陳妙瑛保養得宜，皮膚睇落依然緊緻。陳妙瑛參選1993年香港小姐入行，即使未能晉身三甲，但仍備受力捧。《無頭東宮》為陳妙瑛最後一套拍攝嘅TVB電視劇，同樣一人分飾兩角，因妒忌而欺騙凌雲，搵嚟江湖術士將二人容貌交換，命運從此逆轉。陳妙瑛於事業高峰期離巢TVB轉行從商，建立自己嘅「美容王國」又進軍飲食界開餐廳，成為商界女強人。

張兆輝（飾演角色：皇帝）
60歲張兆輝都係其中一個被激讚凍齡嘅演員，睇落去比實際年齡後生。張兆輝2020年離巢TVB，同年曾於一個網上直播節目中開金口大展歌喉，有粉絲就留言大讚佢係「2020年樂壇新人王」及「樂壇欠張兆輝一個交代」，張兆輝2021年約滿邵氏兄弟，現時接拍內地網絡劇為主。

敖嘉年（飾演角色：楚楚、凌雲之子趙熙）
46歲敖嘉年2009年憑《巾幗梟雄》奪得「飛躍進步男藝員」，再於2011年憑《巾幗梟雄之義海豪情》「排骨仔」一角入圍「最佳男配角」最佳五強，演技得到肯定。敖嘉年至今仍活躍於娛樂圈，不時出演舞台劇，去年與梁嘉琪合作主持開電視節目《嘉嘉醫療自助班》，今年新年又與5位《聲夢傳奇2》馬來西亞學員彭詡越（Xair）、梁宸語（Zev）、王紫薇（Ziwei）、陳泓升（Vincent）及潘乾政（Zentson），及3位香港《聲夢》學員何晉樂（Rock）、文凱婷（Aeren）及林智樂（Felix）錄製2023年賀年MV《想要乜嘢都可以》。

魏駿傑（飾演角色：換臉大師蕭濤）
55歲魏駿傑近年甚少於幕前演出，看似發福唔少。魏駿傑2008年同細19歲嘅女友張利華結婚，2010年育有囡囡Jessica，可惜佢哋喺2015年屢傳婚變，仲有媒體影到張利華背夫偷搭外藉男士去嘉年華同埋喺的士激吻，及後魏駿傑喺舊年坦承同張利華離婚，並指同前妻嘅感情一早出現裂痕，將會獨力照顧女兒同埋以佢為優先。

杜大偉（飾演角色：楚楚、凌雲之子趙（凌）丹）
46歲杜大偉早於1997年加入藝員訓練班，曾經身形暴脹，直至希望由兒童組重返劇組先的起心肝減肥；近年，於《愛‧回家之開心速遞》飾演Peter而入屋。

麥長青（飾演角色：凌大義）
54歲麥長青2019年離巢TVB，曾於ViuTV節目《晚吹-有酒今晚吹》大爆TVB工作多年由主角變大配角，更被當透明人，所以一早想離巢。離開TVB後，麥長青將事業重心移至內地。

許紹雄（飾演角色：凌鐵）
74歲許紹雄為TVB金牌綠葉王，2018年初決定退休，一家人長居新加坡，曾經與太太、女兒接受新加坡電視台節目《我懂你》訪問，並將價值2千3萬港元嘅4千呎豪宅曝光。許紹雄仲打本7百萬元畀女兒開cafe和港式茶餐廳，許紹雄更親自落場打點事務。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！