張文慈直播帶貨曾爆喊 轉投王祖藍公司現居廣州發展
亞姐出身嘅張文慈(Pinky),上年獲一間直播帶貨公司誠意邀請加盟,最終佢選擇暫別TVB,移居上海發展。雖然佢事事親力親為,由揀選貨品、銷售去到顧客服務,不過可惜睇佢直播事業未如理想,觀看人數只有幾百人,甚至有網民質疑佢普通話唔掂同直指唔識佢,而佢亦試過直播期間爆喊及發文大呻辛苦,仲話「下世唔再做主播了」。去到今年一月,張文慈宣布與上海公司解約,並加盟海西傳媒文化暨香港手工藝華南區總部,而王祖藍仲係呢間公司嘅老闆之一。
農曆新年時,張文慈返回香港與家人過新年,現時佢已經返回內地工作,日前佢仲透露自己正式搬到廣州定居,仲同大家介紹佢嘅新居。喺片段中,張文慈為網民介紹自己嘅廣州新居,仲表示新居係租嘅,雖然只係簡單裝修,不過佢覺得非常溫馨。從片中所見,新居係一房一廳,兼有一個小露台,配以簡約風設計嘅裝修。另外,佢喺片中亦提到搬到廣州嘅原因,第一就係大家共同語言比較易溝通,第二就係佢鍾意食廣州菜。最後,佢仲話希望快啲儲夠錢,可以喺大灣區置業。有網民就估計佢現時租住嘅單位鄰近廣州豪宅區珠江新城,而該區嘅租金為過萬人民幣。
唔少網民都留言表示歡迎佢及為佢打氣,例如「廣州歡迎你」、「加油,天天開心,愛你,我的女神。」、「喜歡你呀,好多經典港劇呢。歡迎多走走啊」、「歡迎成為廣州人呀」、「好高興,歡迎漂亮姐姐」及「新生活,加油」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!