從新人蛻變做一線花旦再變人妻 見證嘉欣BB歷程嘅5個男人

近日有消息指鍾嘉欣已經誕下BB，榮升做人媽咪啦，恭喜恭喜～其實去年嘉欣BB突然同圈外男友結婚嘅消息震驚香港娛樂圈，因為真係估佢唔到。宜家嘉欣就好幸福啦，有老公有BB，咁唔知嘉欣BB嘅螢幕／緋聞男友宜家又點呢？

1. 馬浚偉（馬仔）－見證成長嘅好拍檔、熒幕情侶

其實馬浚偉同嘉欣BB就無傳出過緋聞嘅，之但係佢哋合作過好多次，穩佔經典螢幕情侶嘅地位，無理由唔提吓掛？鍾嘉欣入TVB第一部正式演出嘅劇集就係《皆大歡喜》（時裝版），飾演「洪白嵐」一角而為人熟悉。而馬浚偉飾演「施梓山」喺最後100集加入，最終同鍾嘉欣成為情侶。之後喺劇集《金石良緣》、《老友狗狗》、《蒲松齡》同《當旺爸爸》都同馬仔飾演情侶，所以其實馬仔係見證住嘉欣BB入行以嚟嘅成長。而嘉欣BB講過啱啱入行得自己一個喺香港，曾經覺得好孤單同壓力好大，個人又慢熟，所以初頭無咩圈中好友，但馬仔就好似大哥哥咁成日照顧同鼓勵佢，先可以渡過難關。雖然兩個人無正式上契，但感情好好，嘉欣BB結婚都有叫過馬浚偉出席婚宴。

2. 伍允龍－經歷風雨的「好朋友」

講得嘉欣BB，一定唔可以唔提伍允龍。佢哋嘅戀情畀傳媒講足8年，雖然從來無親口承認過，但係喺香港娛樂圈嘅眼中已經係公認嘅一對。佢哋因為07年拍電影《十分愛》傳出緋聞，一直以「好朋友」相稱，13年伍允龍現身支持鍾嘉欣首個演唱會，14年伍允龍同嘉欣BB互相出席彼此嘅生日會，被指以「主人家」身份幫手招呼朋友。雖然當時一直有指女尊男卑，不過嘉欣BB由事業起步到躋身TVB當家花旦，身邊都一直有呢位「好朋友」支持，一齊經歷過風風雨雨，就好似一齊成長嘅兩小無猜咁，所以其實後來都有唔少人轉而支持佢哋。不過以為兩個打風都打唔甩嘅時候，突然改以普通朋友相稱，伍允龍仲話有一段時間無見嘉欣BB，然後去年嘉欣就同圈外男友結婚囉。

雖然成為過去，但近日伍允龍憑劇集《城寨英雄》打手「龍成虎」（貓仔）一角彈出，打得又睇得，暖男保鏢同聽話孝子，同佢嘅好身手形成反差，惹得一眾網民同觀眾喜愛，仲有傳同劇集入面有感情線嘅劉佩玥擦出愛花火。打足15年終於受到賞識，佢近日仲話如果嘉欣BB生咗嘅話會送上祝福同禮物，睇嚟已經下定決心Move on啦喎，龍成虎，睇好你架！

3. 林峯－事業搏殺期

林峯因為同嘉欣BB先後拍劇集《溏心風暴》同《溏心風暴之家好月圓》，兩套劇都飾演情侶而傳出緋聞，唔少觀眾都覺得佢哋好襯，自動FF佢哋喺埋一齊。其實當時係嘉欣BB嘅事業搏殺期，同林峯螢幕情侶嘅形象，某程度上的確令佢獲得唔少觀眾緣，傳緋聞對佢事業有一定幫助。不過講到明搏殺期，加上仲有個伍允龍緋聞男友，所以一直有指襄王有夢神女無心。而佢哋嘅緋聞傳咗5年，直至林峯被爆出同國內o靚模潘霜霜床照，林峯被逼承認同潘霜霜拍過三個月拖，同嘉欣BB嘅緋聞就不了了之。不過宜家大家都知，林峯好愛好愛好愛好愛好愛好愛好愛千語BB。林峯2013年公開承認千語BB女友身份，雖然一直有指千語BB拜金港女，但係兩個人一直恩恩愛愛，不受負面批評影響。

4.陳展鵬（煎pan）－事業成熟期

陳展鵬自從11年回巢無綫之後，就一直緋聞不斷，當中嘉欣BB係傳得最勁嘅一個。12年因為拍劇集《巨輪》傳出同喺戲入面飾演佢女友嘅嘉欣BB戲假情真，煎pan甚至喺電台訪問中直認對女主角難以抽離，13年煎pan仲用過百萬跑車接載鍾嘉欣去澳門出席劇集宣傳活動，緋聞愈傳愈烈。不過呢個時候嘉欣BB已經穩佔TVB一線花旦地位，係可以獨當一面嘅女主角，唔需要再靠緋聞增加人氣，所以今次嘉欣BB直情喺個人微博公開否認同煎pan嘅緋聞。

5. Jeremy－真命天子

嘉欣BB兜兜轉轉咁多年，終於喺去年認識到佢嘅真命天子Jeremy。2015年經家姐介紹認識前TVB高層梁乃鵬姪仔醫生Jeremy結婚，之後秋季被求婚、年尾結婚。今年2月，嘉欣BB就同Jeremy喺加拿大溫哥華補辦喜酒，仲親自寫咗首歌《我結婚了》，更加喺5月母親節宣布懷孕，近日更有傳已經誕下BB。雖然靚女嘉欣BB突然嫁畀年紀大佢唔少又唔靚仔嘅Jeremy，令到當時有唔少網民唔睇好，但見到嘉欣BB發佈嘅婚照一臉幸福咁望住Jeremy，睇嚟佢真係已經搵到佢嘅真命天子啦。

圖片來源：劇集《金石良緣》、劇集《老友狗狗》、伍允龍@微博、劇集《溏心風暴》、劇集《溏心風暴之家好月圓》、劇集《巨輪》、鍾嘉欣@Facebook